MILAGRO DE ARVOLE - - JABUTICABA

Judeo-Espanyol Sesli Dinle
20 Mayıs 2020 Çarşamba

İsak Eskinazi 

 

La fruta de Jabuticaba i kon su otro nombre La Fruta de Brazil, es un arvole ekstraordinaryo i el uniko arvole en el mundo, ke su fruta krese en el tronko del arvole i no en las ramas. Kuando la fruta se aze de kolor violeta, se entiende ke ya esta madura. 

Los payises de su orijen son El Brazil, El Paraguay i la Arjentina. La fruta de Jabuticaba es fruta de enverano i es muy suliya i aresfreska los diyas de muncha kalor.

Jabuticaba komo se ve en las fotos, las frutas estan en el tronko del arvole. Al empesijo de la primavera kuando las flores violetas empesan a salir en el tronko del arvole, avagar avagar las flores se engrandesen i se trokan en forma de uvas. Estas frutas poko a poko toman la forma de una freza grande i se pueden guadrar bastante tiempo.

El arvole da frutas kada 2 anyos. Kon esta fruta se puede azer marmelada, dulse o sumos de frutas ke son muy refreskantes diyas de muncha kalor.

Se dize ke esta fruta de Jabuticaba es melezina para las amigdales, para la astma i para la diyarea.

La naturaleza guadra todaviya munchos sekretos ke devemos de ambezarmos i apresiar todo lo ke tenemos entre muestras manos, para aprovechar sin danyar lo ke aze parte de la ekolojiya mundial. 

Siz de yorumunuzu yapın

Tüm Yorumları Görün