Kuando Muncho se eskurese, es para Amaneser

Anet PASE Judeo-Espanyol
22 Nisan 2020 Çarşamba

 La Psikolojia Sosial se enteresa en lo umano. Komo pensa uno del otro, komo se influensa uno del otro i komo tyene relasyones uno kon otro. Los sujetos primeros en esta siensia se imprimieron en en los anyos 1900. Ma despues de la II. Gerra Mondial es ke se izo una siensia aktiva i produktiva. De ke?

Porke la II. Gerra Mondial era un punto de romperpor el mundo. El benadam  empeso a a demandar. De ke? Kuando una persona ordinaryatoma un orden, se puede azer tan kruel ke los SS. Komo la umanidad ekspozo este modo de komporto de espantar, los sientifikos izeron munchas provas enriva de esto para entender kualo esta afitando en el meoyo del benadam. Afilu se trokan las valores, kuando se trokan las situasyones. Tambien el akontesimyento del 11 Septembre en los Estados Unidos i la Gerra de Irak. Estos son los importantes puntos de rotura de la umanidad. I agora estamos en los tiempos de Covid19. I esto se va eskapar. Ma va deshar trasas en la vida del benadam. Komo de trasas? 

Kuando mos enkontravamos kon los amigos, era ley de bezarmos i abrasarmos. Kuando estavamos indo al bazar mos, plaziya gostar un poko de la fruta. No pasava un diya sin salir a la kaye. Los kaveyos echos en el kuaför.  Dingun diya no se amostravan los kaveyos blankos. No aziamos pan en kaza. Dingun diya no izimos tefila en el internet en kaza. Era ley de ir al kal. Esta lista se puede alargar muncho mas. 

I esto se va eskapar. Va pasar tiempo, la siensya va investigar los trokamyentos ke dio al mundo esta pandemia. De agora ya empesimos a avlar ke kuando vamos a salir de kaza, no va ser el mundo ke konosemos. Puedeser mas bueno va ser, por mozos, porke estamos mas muncho tiempo pasando kon la famiya i de si para si. Estamos gizando mas muncho. Estamos komyendo kozas mas valutozas. Afilu el klima esta en repozo. Esta avansando tiempo. Estavamos avlando ke se aviya ensuzyado el aver. Mira agora, las Indyas despues de tantos mezes agora esta viendo el sielo klaro. Las beemas de las mares estan liberos. Estan pujando agora. Mozos mos enkashimos a muestros kantonikos. Ma el mundo esta kontinuando a tornar. Esta kontinuando i despues del aleskuro va vinir el amaneser. 

Komo se investigan estas dezgrasyas kuando pasan del mundo? Se investiga los rekuerdos. Las fotos. Los artikolos. Los haberes. Estos todos son dokumentos. Va vinir tiempo se va travar filmos sovre estos diyas. Se va eskrivir romansos sovre los ke peryeron la vida del Covid19. Savesh komo de valutozos son los diaros, jurnales ke vash a eskrivir. Esto todo es la memorya del tiempo. Vos oguro a todos vozotros, memoryas sin oras pretas. El Dyo Baruhu ke mos kite a los diyas klaros, kon todos djustos i kon sanedad. Amen. 

 

Siz de yorumunuzu yapın

Tüm Yorumları Görün