EL PISHKADO...

Komo disho Metin Delevi en su eskrita de 18 Marso, kuando se avlava de hazinuras, mos diziyan: “Pishkados a la mar!”, para ke se vayan todos los males a la mar. Ijos, troká de lashon

Esti SAUL Judeo-Espanyol
22 Nisan 2020 Çarşamba

Keridos lektores,

Estas prekosiones para aleshar los sujetos pesimistos... Estos dias de la primavera, kon arvoles de erguvan (arvole de Yuda) yenos de flores sera agradavle. Me prometi de ser optimista...

Me izo pensar al arte de kedar sanos i rezyos en konsomando una de las rikezas de las mares de muestro payis, Marmara, Egea, la Mar Preta i el Mediterraneo: los pishkados, ke son depos de Omega 3, rikos en fosforo, en antioksidanes, ets. Las bienfezensias por sigura son grandes.

I sovre todo achileyarvos los korasones, PENSANDO A LAS VAKANSAS EN LAS KAMPANYAS.

Profitar del pishkado:

Sea los chikos, sea los grandes, se profita para arezyar los guesos, sin olvidar ke la depresion, el riziko de diabet i las dolores se kalman, las selulas se reparan, el korason se arezya, amengua el riziko de alzheimer i tambien aze developar la intelijensia.

Kualos son los pishkados de muestro payis:

Eskumbri (uskumru), stavrida (istavrit), lufer (bluefish), palamida (palamut), anchuez (hamsi) i tambien merlan (mezgit), kırlangıç (sea robin), ets. 

La sezon de kalkan (turbot), chifalo (kefal) i sin olvidar la barbunya (mullet) kon su savor partikular, en el mez de Marso...

Kuando la sezon avansa i el lufer perye la savor, la palamida (palamut) se friye o se prepara el pilaki. 

En las mares de muesto payis: las aguas mos alegran las mezas de otros chishites de pishkados.

El somon i el alabalık (trout) se importa de Norvejia, del Oseano Atlantiko i de los Estados Unidos.

La saveduria es de preparar la lakerda (palamida salada), el chiroz (eskumbri seko) marinado o en salamura, sin olvidar la supa, las koftes, el yahni, el plaki, o el asado o frito.

Es la sezon kon su savor partikular de no azer mankar el pishkado de muestras mezas...

Vos sueto i espero ke la umanita dominara la epidemia i la kriza mondial.

Kantaremos la melodiya ke mos kantavan i ke kantimos a muestros bebes para amuzarlos:

Pishkadikos a la mar, djup djup a la mar...

 

 

Siz de yorumunuzu yapın

Tüm Yorumları Görün