İsak ESKİNAZİ
En los anyos ke van a vinir no kreyo ke va egzistir el telefono de aldikera. Mizmo los ke fabrikan oy estos telefonos no kreyen a su futuro. Dainda no estamos en la jenerasyon 4.5, ke ya se esta avlando de jenerasyon 5 i 6.
Kada dia ke mos despertamos, mos parese ke el mundo es el mizmo de ke aze 30 o 40 anyos. Ama savemos ke dentro de estos 30 a 40 anyos munchas kozas van a trokar i no van a ser lo ke son oy.
La teknolojiya va trokar, la muzika va trokar, el modo de vida va trokar i el punto de vista de la mueva jenerasyon va trokar totalmente. Kero dizir ke la manera de bivir i de ver los evenimientos van a trokar. Esto mos aze pensar ke kada koza mueva en la siyensa mos parese komo una maraviya o mizmo majiya.
Oy mos parese imposible, ama savemos ke los otomobiles ke van a kaminar sin shofor van a ser kozas normales de kada diya. Oy a los aedados de mas de 80 anyos mos dizen de no kondusir. Kon los otomobiles sin shofor i esto va ser muy normal.
Muestro kompanyero S. Aji dize ke vamos a tener karne de kordero o de vaka sin degoyar la beama. Dando a las selulas el musklo, la godrura, la sangre i el alimento ke nesesitan, estas selulas mutiplikandosen, mos van a dar la kostiya la mas savroza o la pierna la mas tierna, sin ke la beama dezapareska. I asi Sami mos aze akodrar de tornar a las avas sekas ke son yenas de proteinas. Tanbien se dize ke riir es komo komer doz kostiyas al diya. A kada uno a su gusto… I los shohetim, van a tener mas tiempo para deskansar.
Klaro ke desde agora los bushkadores estan lavorando sovre la intelijensya artifisyal, sovre los robotes. No savemos muy bien lo ke va okurir dentro 10 a 20 anyos, i puede ser mos va azer dizir ke todo esto esta vinyendo de otras estreyas, de otro mundo.
No olvidar ke la enerjiya esta trokando. La enerjiya solar, la enerjiya del viento, de la agua, de las mares i los oseanos se estan aziendo muncho mas komun. Todo esto va trokar el rolo del petrolio i del peham… El Internet ke no konosiyamos aze pokos anyos, klaro ke se va azer koza banal.
Kon los instrumentos ke se estan empesando a ver en el mundo, los ke van a avlar por egzemplo en Japonez i keren ser entendidos en Ladino, las palavras van a yegar en Ladino via muestros hologramos o aparatos ke ya se estan empleando… Yo vo avlar en Ladino i el Aleman lo va oyir en Aleman. Esto ya se esta utilizando i se esta bushkando kaminos mas fasiles para adaptarlo a todo el mundo sin tener frontieras de Linguas. Asi ningun menester de traduktores, ni de ambezarse por anyos una otra lingua.
Puede ser ke lo ke vamos a pensar va pasar a la eskriturya sin tener pendola o klavye. Kon los lavoros de Mikrobiolojiya, las fonksyones del puerpo umano pueden trokar, komo organizar muevos miembros i darles muevas fonksiyones.
Los lavoros para evitar los problemas de viejes i alargar la vida, lavoros para adelantar en la medisina i servir a la umanidad para sufrir menos de enfermedades van a ser muncho mas fasil. Puede ser ke los doktores van a topar melizina para evitar el olvido, i ya empesaron a meter chipes dentro del puerpo para kontrolar de leshos varias fonksiyones del las personas.
Puede ser ke las pastiyas para ombres para evitar de deshar prenyadas van a estar en las aldikeras de kada uno. Ama tanbien, i munchos otros kaminos fasiles para tener kriaturas ya estan a la dispozisyon de muncha djente.
Puede ser ke vamos a tener elektrisidad sin kablo i sin priz. Las profesyones van a trokar en los vente anyos ke vienen. Kodak tenia 170.000 empleyados aze 20 anyos. Oy esta firma no egziste.
Keridos lektores, no desharemos de sonyar, ma miraremos de bivir en pas el dia ke mos esta akordando el Kreador. No olvidar el pasado, no tener ansyas por el futuro i bivir el dia de oy en plenitud.
