Una Semana en Atina

Judeo-Espanyol
26 Şubat 2020 Çarşamba

Kenan Cruz Çilli

 

La semana pasada pasi una semana entera vijitando Atina, la sivdad kapitala de la Gresya. En Atina fui en bushkidad de erensiya ke aparteniya al periyodo de los Otomanos ke kontrolaron i administraron la sivdad desde el anyo 1458 asta 1833. En este periyodo aviya en Atina diversas komunidades, entre eyos gregos, muzulmanos, armenios, i djudios. En la periyodo de una semana yo topi templos relijiosos ke mos akodran de kada uno de estas komunidades i meldi muncho sovre la istoriya multikultural de la sivdad.

Oy en Atina ay una populasyon djudia de 3000 personas. En una kaye ke se topa mizmo en el sentro de la sivdad se topan dos sinagogas: una de la komunidad de los romaniotes i una otra ke apartenese a la komunidad sefardi. Kuando vijiti la sinagoga sefardi, el mansevo ke me dyo enformasyones sovre el kal me disho ke la mayoridad de los djudios en la Gresya son sefaradis ama ke munchos de la jenerasyon mueva se fueran a otros payizes en Evropa o a Israel achakes de la kriz ekonomika. Komo en la Turkiya munchos de la jenerasyon mas vieja son avlantes de judeo espanyol ama de los mansevos mankos i mankos entyenden o avlan la lingua.

En el muzeo djudio de la sivdad topi algunas kozikas komo letras o jurnales antiguas eskritas en judeo espanyol. Mizmo ke oy no ay dingun jurnal djudio en el payiz, antiguamente la Gresya i en spesyal, Salonik era un sentro muy grande de la kultura djudia en el Imperio Otomano i ayi eran publikados unos kuantos jurnales djudios. Ay una koza muy enteresante en el muzeo ke se topa en el ultimo etaj. Ayi se topan algunas komputadoras kon akseso a un grande archivo ande puedesh oyir videos de djudios gregos avlando sovre sus vida, sus chikez, i sus tradisyones en variyas linguas diferentes. Klaro ke algunos de los videos estan en Ladino i por mi fue interesante oyir djente uzando i karishtereando mas palavras Gregas en sus Ladino.

Tambiyen en el sentro de la sivdad vijiti una iglesiya de los armenios i vide dos djamis turkos antiguos ke agora malorozamente estan serrados. Mi vijita fue en la mizma semana ke el diya de la komemorasyon de la Shoa. Entonses kuando vide la memoriyal a las viktimas gregas del Olokosto pensi muncho sovre komo seriya esta sivdad kuando la komunidad de djudios era muncho mayor. Vide munchas flores a serka del memorial i pensi sovre las istoriyas de la shoa ke oyi en el muzeo. Ke todas las viktimas se repozen en Gan Eden.

 

 

 

Siz de yorumunuzu yapın

Tüm Yorumları Görün