Munchos estudyos se realizan para desidar kualos son los paizes los mas edukados del mundo. OCDE izo una lista de estos paizes despues ke se dyo la desizyon final.
Segun estos estudyos las diez nasyones las mas edukadas son: Kanada, Japon, Israel, Korea, Inglatierra, Los Estados Unidos, Australya, Finlandya, Noruega, Luksemburg.
En jeneral, la edukasyon djuga un grande rolo en el developamyento sosyal, umano, i ekonomiko. La edukasyon puede ogmentar la igualdad de jenero, aminguar el matrimonio infantil, asigurar la pas, i en jeneral ogmentar las posibilidades de tener una vida saludoza. La edukasyon es un derecho umano ke da a kada persona mas munchas oportunidades en la vida, komo oportunidades de empleyo, mijor salud i la kapasidad de partisipar en el proseso politiko i sosyal.
Komo puede la edukasyon ayudar al progreso de un paiz?
La edukasyon es muy emportante para ke un paiz se prospere. Las personas edukadas son konsyentes del estado sosyoekonomiko del paiz, i pueden ayudar a su progreso. La persona edukada ya save komo kontribuir al bienestado del paiz, por egzamplio, tomar un otobus para ir al echo al lugar de ir kon otomobil. Una de las razones de su konsyensya es porke ya le ambezaron estas valores en la eskola.
La persona edukada save a ken votar para ke se realize una diferensya pozitiva en la ekonomiya de su paiz.
La edukasyon ayuda a eskojer lavoro: eskojer un lavoro para ganar mas muncho i progresarse. A los graduados universitaryos se les paga mas muncho ke a los ke no tienen un titro universitario.
Si en un paiz ay munchos sivdadanos sin empleyo, esto es un obstaklo para el progreso del estado ekonomiko i del developamyento del paiz.
La edukasyon ayuda a las madres solas. Las madres solas ke no tienen edukasyon no pueden obtener un lavoro bueno para mantener sus ijos. La edukasyon puede ayudar a las madres solas a engrandeser sus ijos mijor, a edukarlos, i ayudarles en todo modo de koza, i a ambezarles a ser sivdadanos responsavles del paiz.
La edukasyon ayuda a amenguar la provedad de un paiz.
Si un paiz kere asigurarse ke ayga igualdad de oportunidades para todos, independente de su raza, jenero o klasa sosyal, es nesesaryo ke ayga igualdad de edukasyon para todos.
La edukasyon diminua la violensya de jenero. En munchos paizes, la violensya de jenero es un obstaklo al derecho de edukasyon de las ijikas. Los avuelos ke no tienen edukasyon no embiyan sus ijas a la eskola, i las forsan a kazarsen a una edad muy chika. Si un puevlo es edukado, esto les ayuda a trokar la mentalidad del paiz, i a aminguar la violensya.
La edukasyon ayuda a aminguar el porsantaje de mortaldad de las personas. Las personas se suanyan mijor, i biven mas munchos anyos, i el governo tiene kudyado de la sanedad de sus sivdadanos i les ofrese mas buena atansyon medika.
