La Rekompensa Del Sultan

Eliz GATENYO Judeo-Espanyol
18 Aralık 2019 Çarşamba

Aviya un sultan en un payis del oriente ke se enfasyava muncho. En el payis suyo todos lavoravan bueno, todos estudiavan bueno, no aviya dinguna matansina, dingun rovo de sorte era ke no teniya muncho echo i se enfasyava.

Todos lo keriyan bien i miravan de engleneyarlo. Un diya vino a la puerta del palasio, una persona ke keriya ver al sultan. Siguro ke las guardias no lo desharon entrar pishin. Le demandaron, “Kualo keres del Sultan?”. El disho ke solo al Sultan le va dizir su dezeyo. 

Entonses, oyo el Sultan las bozes  i se aparo kon merikiya. Kualo estava afitando?

Se fue a la puerta i vido a este ombre i le demando lo ke kere.

El ombre le disho. “Mi presyozo Sultan. Oy vine aki para kompartir kon su Altesa, el rezultado de mi lavor de 20 anyos. Lavori 20 anyos para este marafet i vine a amostrarlo por primera ves ande El.” “Bueno!” disho el Sultan. “Entra veremos i amostrame este marafet.”

“Ma”, disho el ombre, “Tengo una kondisyon. Por rekompensa kero 40 oros.” Se metyeron d’akordo i entraron al salon grande i riko del saray.

“Agora, va enfingar una alguja en basho, me va ir 40 pasos atras, va tomar un ilo, lo va echar verso la alguja i lo va pasar por su ojo.”

“Ayde veremos!”. Ampeso el ombre a su Show. I lo eskapo kon grande sukseso. El Sultan se kedo enkantado. Le plazyo muncho, dyo palmas i palmas durante muncho tiempo. Verdad ke se engleneyo.

Dyo orden a su vizir ke le den al ombre 40 oros. El vizir pishin kito 40 oros de la bolsa i los dyo al ombre. El ombre estava muy orozo, tomo los 40 oros i ampeso a irse.

Ensupito se oyo la boz del sultan. “Vizir! Ven aki! Antes ke salga este ombre de la puerta, dalde 40 falakas!” Todos se kedaron kon las bokas avyertas. El ombre demando al Sultan: “Deke meresi yo estos 40 palos?”.

Disho el Sultan: “Tu de verdad ke izites un grande marafet. Ma, el tiempo ke gastates para esta bavajada, kaliya ke lo gastaras para una koza mas util para la umanita.”

Ansina disho el Sultan, ma yo no esto de mizmo avizo ke el. Vos va dizir deke? Este ombre, siguro ke teniya una kapasidad; se metyo en tino ke lo va azer,  peno i lazdro durante 20 anyos para parvinir a azer esta maestriya. Yo penso ke todas las invensyones se realizan en bushkando kon pasensya, en lavorando sin peryer konfiyensa en si.

En la istoryika ke vos konti, el rezultado del lavoro de este ombre puede ser ke fue el empesijo de otras grandes deskuviertas. No kero egzajerar ma en la baza de los premios Nobel, se topan esta ardor i ambisyon de topar kozas muevas para el bien de la umanita. Una invensyon avre la puerta para otra invensyon.

Enfin los oros fueron una buena rekompensa. I para eskapar kon una sonriza, “Si demandavsa mankos oros iva komer mankos palos!”

 

 

Siz de yorumunuzu yapın

Tüm Yorumları Görün