Diya de Jugeves tuvimos una seria de teremotos ke mos espanto muncho. En el primer, yo estava aryentro del otomobil asperando a mi marido. El otomobil no estava lavorando dainda. Me meneyi, me paresyo ke era una persona ke paso del lado. En no viendo a dingunos me paresyo algun perro. Ma esto no estava ni de perro ni de gato, me estava meneyando i saltando bueno. Yo no me espanti lo djusto porke estava en un lugar vaziyo. No aviya kazas al entorno. Kije saver por las ijas, ma malorozamente los telefones estavan todos blokados. Emposivle de tomar haber. Del Dio ke estava dainda de diya, porke me akodro el rash de 1999 ke mos afito a medya noche en lo areskuro, tuvimos panik grande. El sentro de el rash de jugeves fue en Silivri. El primer rash teniya la magnitud de 5.9. Los de despues eran mas chikos ma se sintiyan bueno. Siguro en todas las televizyones se ampeso a avlar de esto. Ya savemos ke Estambol se topa ensima de un fay grande ke se topa debasho de la mar Marmara. I se esta asperando un rash muy grande ke puede destruir la sivdad entera. Por esto, ya ay unos kuantos anyos ke se estan egzaminando las kazas i si ay algunas kazas ke estan en perikolo, las estan derrokando i las estan fraguando demuevo, para ke rezistan al rash ke se aspera. El Dio lo save si estan rezyas. Todos los profesores i sientifikos ampesaron a dizir sus ideas. Ken dize ke este rash no tiene dar i aver kon el fay grande perikolozo, ken dize ke este rash esta dando haber ke el rash grande se esta aserkando. Otros ampesaron a dizir ke tomemos prekosyones, komo aparejar una chanta, i ke metamos aryentro: agua, konservas, tovajas, chuflete, kuras, los papeles emportantes, vistimyentas i mas i mas. Ke tengamos esta chanta serka de mozotros para tomarla i fuyir una ora mas presto al lugar ande mos vamos a arekojer en el tiempo de panik. En Estambol ya no kedo mas meydanes, parkes; todo esta yeno de fraguas. Una sivdad de kaje 15 miliones de personas, ande van a kaver? La gazeta eskrivio de entrar al internet i ambezarmos, ken se va arekojer en kual lugar. Mirimos, el lugar ande mos vamos a arekojer mozotros va ser 3 kilometros mas leshos de ande moramos. Puedesh imajinarvos? Si El Dio ke mos guadre, afito una destruksyon, komo vamos a kaminar 3 kilometros para ir asta aya, en pizando ensima las piedras i los betones. I si no estamos en kaza? Puedemos estar en la kaye, en una botika, en una vijita. Ke vamos azer? Mos vamos a ir en primero a kaza a tomar la chanta i despues vamos a korrer a este meydan?
Sigun mi, malorozamente no ay nada ke azer. Mis padres diziyan “El Dio ke mos guadre, de lo ke no mos puedemos guadrar.” Esto es.
En estos diyas de fiyestas i alegriyas ya vos keriya eskrivir otras kozas mas plazyentes.
Vos auguro una anyada buena, saludoza, sin sar i sin mal. SHANA TOVA.
