Saver es bueno
İsak Eskinazi
Ke el mundo i el universo tenga una edad, oy es una evidensya i ke esta edad tenga munchos milyardas de anyos, es tambien una sertitud.
Aze mas de dos mil i kinyentos anyos ke los filozofos de la antiguedad se metyeron de akuerdo, dizyendo ke el mundo no se puediya krear de “nada”. Ama asta el siglo diez i ocho, estas teoriyas bazadas sovre la teolojiya, ke es la siensya de Relijion, mos aze limitar kon los anyos eskritos en el ‘Bereshit’, i estos anyos no van mas de 5779 anyos…
Kon el tyempo los savyos de fizika yegaron al rezultado de algunos sientos de milyones de anyos, i oy kon la teknika nuklearya, se avla de munchos milyardas de anyos.
En “Shir a Shirim” se dize ke todo lo ke era es i nada de muevo debasho el sol. El dia i la noche se repiten, el enverano i el inviyerno se repiten sin kansarsen. Ansi kaji todo es una repetisyon. Los filozofos komo Demokritos (-460-370), Platon (-428-347), Aristo (-385-322) apoyaron este punto de vista. El fliozofo Aristo estava muy seguro ke el mundo es eternal i diziya; “El sielo es eternal, sin empesijo i sin fin i kontyene el tyempo sin fin. Los rios nasen i mueren i las inondasyones no se van siempre a los mizmoz lugares. Todo troka kon el tiempo. La tierra de ayer no es la mizma ke la de oy).
Komo se save ke Alaska i Sibirya antes formavan una mizma tierra, i el estrecho de Bering no egzistiya... La Mar de Marmara i La Mar Negra antes eran kada uno un lago diferente. Es kuando los estrechos de Chanakkale i del Bosfor se avrieron, las tierras de Chanakkale i Gelibolu se separaron i fueron yamadas el lado Anadolu i el lado Rumeli. Es dizir ke la jeografia kon el tiempo se esta trokando.
Estas teorias de Aristo kedaron kaji dos mil anyos tal komo eran. Estos kambiyos se izyeron mas konkretos kuando vyeron ke la tierra tenia tabakas diferentes devido a los volkanes i tanbien a las trasas de fosiles de peshkados en las montanyas. Kuando en diferentes lugares fueron enkontrados fosiles asemejantes, los jeologos empesaron a dudar ke los anyos eskritos en los livros santos no pueden koresponder kon los anyos de estos fosiles topados. Ademas kon la teoria de Darwin sovre la evolusyon, esta duda se izo mas absoluta.
George Louis Leclerc, ke bivyo en los anyos 1707-1788, por primera vez sinyalo ke el mundo devia ser parte del sol, i ke se aranko devida a una kometa. Leclerc kalkulo ke pasaron 75.000 anyos asta ke la tierra se izo abitable. Por la edad del mundo, el penso ke devriya de tener mas de diez milyones de anyos. Ama en akeya epoka el no tuvo el koraje de anunsyarlo, pensando ke dingunos lo ivan a kreer.
Kon Pierre i Marie Curie, ke deskuvriyeron la radioaktividad en 1905, Ernest Rurthenford bazandose sovre la dezentegrasyon del uranium, egzamino una mina de uranium, i noto ke teniya a lo menos sien i kuarenta milyones de anyos. Despues de la sigunda gerra mundial, el Amerikano Patterson, penso egzaminar las meteoritas ke fueron formadas en el mizmo tiempo ke el mundo, i esto avriyo el kamino a la repuesta de kuatro milyardas i kinyentos sinkuenta milyones de anyos.
Es asi ke los sientifikos estan lavorando diya i noche para topar una repuesta korekta a la formasyon del mundo.
Adaptado de la
Ansiklopediya Universalis.
