El trezoro eskondido

Eliz GATENYO Judeo-Espanyol
21 Ağustos 2019 Çarşamba

En Colmar (Fransia) en el anyo 1863 se kijo adovar una kaza ke datava del tiempo medieval. Los lavorantes ampesaron a derokar unas kuantas paredes para avrir espasyo. En supito toparon un kantaro de barro yeno de oros i joyas, eskondido en una pared. A ken aparteniya este trezoro, deke estava bien eskondido aryentro de la pared? Despues ke se ekzamino este trezoro, se topo un indisyo (ipucu). En el kantaro de barro aviya 384 liras de plata, 14 aniyos de oro kon piedras presyozas, una yavizika de plata, un pendantif i liras de oro i mas. En uno de los aniyos de oro, estava eskrito “Mazal Tov” kon letras ebreas. Este aniyo era lavorado kon oro fino i piedras presiozas. Teniya la forma del Templo de Yerushalayim. Era un aniyo ke un novyo le aviya ofrido a su novya. Alora este trezoro deviya de apartener a una famiya judiya.

Kuando se topo este trezoro eskondido, se ampeso a azer bushkidas i se entendiyo ke uvo un grande masakre de los Judios en Colmar, en el tiempo Medieval. I este trezoro fue eskondido durante 500 anyos.

Una koza mas enteresante fue kuando toparon un kolye, una kavenika de oro kon una yavizika chika de plata enkolgando. En empesijo no izieron muncho atansiyon a esta yavizika chika. Ma despues de kestionar la vida de los judios en Colmar, toparon ke esta komunita era relijioza. Las mujeres ke se ivan al kal en Shabat, serravan todas las puertas de las kazas i las metiyan aryentro de un kutiko chiko presyozo. Este kuti era enterrado a la entrada de la puerta en un lugar ke no se remarkava.  I la yave de este kutiko la enkolgavan al garon komo kolye. Porke ya savesh ke diya de Shabat no se transporta nada, ma djoyas ya se puede.

Entre este trezoro toparon i florines de Louis de Hungaria.  En los anyos de 1342-1353 kada famiya judiya ke posedava mas de 20 Florines, deviya de pagar 1 Florin al anyo komo taksa al Sakro Imperio Romano. Este trezoro mos da una idea sovre la vida prospera de los judios de Colmar en Alsace, en el Este de la Fransya en  la Epoka del Sakro Imperio Romano. Ansina no kedo dingun safek ke biviyan Judios en Colmar, malgrado ke no se topo dingun kal o otras fraguas relijiozas mas.

Kuando la landre (veba) destruyo la Evropa entera, los judios fueron topados kulpantes de esta maldicha hazinura. Entre 1348 i 1351 la mitad del puevlo judio se muryo, seya de la hazinura o seya de las persekusyones de los kristyanos.

Tambien toparon un dokumento ande eskriviya ke un judio konfeso despues de torturas dezgrasias, ke los judios echaron tosigo a las aguas de la sivdad i por esto todos los judios de akeya sivdad fueron kemados.

Este trezoro ke se topo eskondido aryentro de la pared, esta agora ekspozado en “New York Metropolitan Museum of Art”, ke fue emprestado del Musée de Cluny en Paris. El direktor del muzeo dize ke kale lavorar muncho para anonsar este modo de ekspozisyones, de erensyas kulturales de los judios del tiempo medieval, en los muzeos. 

 

 

Siz de yorumunuzu yapın

Tüm Yorumları Görün