kanada REklam

Kuentos De Mi Nona

Kuentos De Mi Nona

Forti Barokas

En una sivdad biviya un ombre muy riko. El posedava kampos i vinyas, kazas, butikas, de los oros ke tenia el mezmo no saviya el kuento. Tanto era riko tanto era fuerte i no se adjideava de dingunos. Todos los ke bivian en esta sivdad lavoravan para el i no deshava alevantar kavesa a dingunos. Si alguno le avlava u bien keria dizir lo djusto, sin pensar lo kitava del echo i lo deshava sin komer.

El kada noche dava pransos al entorno i todos los ke viniyan a komer i a bever le davan razon a todo lo ke dizia i lo enaltesiyan sin ser meresido.

Un dia un merkader no pudo pagarle en su ora la devda ke tenia, el sin adjidearse le tomo la botika i los bienes de la mano i lo echo a la kaye. Torno a su kaza alegre i kontente, lo yamo al moso para ke le apareje un buen pranso para akea noche.

Este ombre kruel teniya un moso flako de salud ma djusto i sensero. El solo lo ke le puedia avlar i darle konsejos, mezmo ke no lo sintiya i lo arebashava, no se enfasiava de dizirle lo djusto. Akea noche no pudo rezistir a esta endjustisya i le disho:

“Sinyor, lo ke izo oy no es djusto, oy esta en sus fuersas ma viene dias ke pagan djustos por pekadores.”

El buen del sinyor se burlo del moso, lo grito i lo menaso:

“Tu ke saves! Fuersa es paras! Fuersa es bienes! Tu mira tu echo, apronta la meza i otra ves no te meskles en mis echos.”

Paso dias i anyos, el se izo mas riko de lo ke era i adjusto bien al bien. Una noche en estando komiendo i bevyendo viene el moso i le da haber ke el ijo regalado esta muy hazino. El desho a todos, se fue koriendo al lado de su ijo regalado. Lo ve ke esta kemando de kayentura, pasado de si, echado en la kama sin pueder avlar. En gritando dyo orden ke vengan todos los doktores de la sivdad, ma malorozamente dingun doktor no se estava entendiendo de la hazinura ke tenia el manseviko. Kada dia estava yamando doktores diferentes, les estava dando bultos de moneda ma melizina no se estava topando. Todos los ke vinian a komer i a bever ni estavan demandando ni sonandole la puerta, mas ke el moso sensero rogando al Dyo dia i noche refua para el ijo regalado de su sinyor.

Dias i mezes paso, el mansevo no alevanto kavesa, el padre kansado, sin durmir i dezesperado se alevanto de al lado la kama del ijo se fue a la ventana avyo las manos a los sielos i empeso a rogar: “Mi dyo apiyadame! todo lo ke posedo esto pronto a darlo solo mi ijo ke se aga bueno!”

En supito le viene una boz de leshos: NI EL RIKO KON SU RIKEZA NI EL BARAGAN KON SU BARAGANIYA!

 

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın