Eliz Gatenyo
Un grupo de polises amerikanos se fueron a Israel para kooperar kon la polisiya israelyana. Era una viaje simple por echo, en la estasyon de la polisiya de Nahariya, ke se topa en el norte de Israel, para deskuvrir i trokar de parte a parte las buenas praktikas profesyonalas kon sus kolegos.
Este viaje profesyonal se eskapo kon una fiesta de Bar Mitzva para tres polises amerikanos.
Veramente, durante este viaje a Israel, los polises israelyanos deskuvieron ke tres polises de aryentro de este grupo amerikano, son djudios. En avlando toparon ke dinguno de estos tres no aviya kumplido ni fiestado sus Bar mitzvas. El komandante de la polisiya de Nahariya Yossi Charbit, pishin se metyo a la ovra para pueder organizar una fiesta de Bar mitzva en el kal djusto al lado de la stasyon de polisiya de ande se topavan. Todos los soldados amerikanos se emosyonaron muncho, tambien los tres soldados djudios ke nunka pensaron a sus djudaizmo asta akel diya.
Por la primera vez en sus vidas se metyeron tefilines, vistyeron sus talletes. Disheron “Verdadmente ke la persona tiene un sintimiento muy diferente ke asta oy no tenemos sintido. De agora en delantre mos sintimos mas serka de muestras raizes i de muestras tradisyones.”
Esto kere dizir ke mizmo si los kaminos del djudaizmo mos son deskonosidos, nunka es tadre para toparlos. Kale bushkar i topar las mitzvot, komo el komandante de la stasyon de polisiya de Nahariya.
Esto ke vos konti lo meldi en el internet en un grupo ke se yama Torah-Box i eskrito por Alexandre Rosenblum.
Esta istorya me trusho al tino un rekuerdo ke mos konto un amigo israelyano muestro Moshe Tsur de “b.m.”, ke lo peryimos unos kuantos anyos antes.
Moshe Tsur era nasido en Chekoslovakya. Kuando nasyo se yamava Freddie Steinerov. En la okupasyon nazista fue un ijiko mazalozo ke fue fuyido por un grupo de aktivistos voluntaryos djudios. Sus paryentes fueron kemados en los ornos en la Shoa. Akel tiempo el kamino ke fuyiyan a las personas de las manos de los nazistos, pasava por Estambol. Kuando trusheron a Freddie kon el ermano mas grande a Estambol, era djusto su edad de Bar Mitzva. Los ke los aresivyeron, desidaron de fiestar su bar mitzva aki. El mos konto ke fiestaron su bar mitzva en un kal muy ermozo al bodre de mar i al lado se topava un ponte. Sigun mi era el kal de Unkapan ke oy mas no egziste.
Despues ke kedaron un poko tiempo en Estambol, se kijeron ir a Israel, ma en el kamino fueron aferrados por los inglezes i yevados a los kampos de Chipro. I unos kuantos mezes despues se fuyeron a Israel. Desde ke entro a Israel, el mas no kijo yamarse kon este nombre frankeyado. I troko su nombre a Moshe Tsur. El disho ke Moshe es un nombre muy djudio i Tsur kere dizir una roka (kaya). I el fue i va ser una persona fuerte i dura kontra la vida komo una roka.
