kanada REklam

Un fakto enteresante: Un sembol Djudio reprezantando un reyno Musulman

Un fakto enteresante: Un sembol Djudio  reprezantando un reyno Musulman

Pensa a topar un vyejo reyno de la antikidad, en la rejyon del Mediteraneo, en Anatolya, kon una istorya de konkistas i aliansas entrifikadas, i lo mas emportante para mozos, un reyno ke teniya una bandyera kon una estreya blö de sesh puntas / lados. Si estash pensando a lo ke pensi yo kuando vide esta demanda, vos estash yerrando.  Empesando de lo ke pensi avansa en la karta kaji 1000 kilometros i un poko al oksidente asta arivar a la aktual provinsiya de la Turkiya ke se yama oy en diya Karaman. En esta rejyon, desde el siglo 13 asta la fin del siglo 15, una nasyon chikitika yamada “Dinastiya Karamanid” governo un territoryo muy disputado entre munchos dinastiyas, kon una bandyera ke teniya un sembol ke se konose oy en diya komo la “Estreya de David” o “Magen David”.

La heksagrama, la estreya kon sesh lados, aunke oy esta asosyada prensipalmente kon el djudaizmo i Israel, empeso komo un sinyo dekorativo uzado i muy amado por otras tradisyones non djudias. Por lo ke se save, este sinyo empeso kon el aniyo de estampiya del rey Shlomo. Segun las leyendas desvelopados por los eskritores arabos medievales, la estampiya, mandado direktamente de Hashem, del Dyo a Shlomo - nombre ke en arabo i en turko se konose komo Suleyman - poderes spesyales, komo entre otros mandar i azer fuir los diavlos  i avlar kon los hayot - animales.

Aparesyo, junto kon una luna kresyendo, en una moneda romana pintado al doredor de la epoka de Yeshu, i durante la epoka otomana, los dos sembolos aparesyeron en las bandyeras i banderolas de gerra muzulmanas, mozaikos de meshkitas i afilu en los timbros i estampas postales. En 1354, los djudios de la sivdad de Prag resivyeron una bandyera kon la estampa de Shlomo i el eskudo de David, i sinko siglos i medyo mas tadre, fue eskojido komo el simbolo santral de una bandyera en el Primer Kongreso Sionisto. Lo ke paso despues de este kongreso es una istorya ke konosemos todos. I oy este simbolo torno al lugar ande nasyo i esta kontinuando a flotar en el bodre del Mediterraneo, munchos siglos despues de la disparisyon de los Karamanides.

(Inspirado i adaptado libremente del artikolo de Ilana Sechel)

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın