Forti Barokas
Kadıköy i Moda son unos de los mas vyejos sentros de moradores djudyos. Oy en diya kreygo ke kedaron muy pokos moradores. Para mi estos lugares son unos sentros en el kontinente de Asia i nunka pensi morar ayi. Antes dos anyos, mi ijo el grande, me disho ke se va enstalar en Moda. A la ora para, mi fue fin de mundo. Noches enteras no durmi; me se fuyeron los esfuenyos porke el morava 15 minutos de kamino a mi kaza. Komo me va ir, komo van a vinir, komo lo va ver a mi inyetiziko, a ke eskola se va ir, ma no ay ke azer, es su propya desizyon. La primera vez me fui kon mi araba, pensando el trafiko, miri el kamino esta avyerto porke las oras ke me vo el trafiko no es komo demanyana i tadre. En media ora ya estava en su kaza; kijo dizir ke no es mal del mundo.
Una amiga ke mora enfrente me disho ke me puedo ir kon vapor u motor. Un diya ke no teniya de yevar köftikas de prasa i rulos de berendjena (lo mas me yevo komidikas ke les plaze), dishe aprovare irme kon vapor. Me fui a Beşiktaş miri kada 15 puntos ay u motor u vapor a Kadıköy. La ora me uydeyo; al vapor me suvi; siguro yo debaldes! Me asenti no me asenti tres mansevos kitaron sus enstrumentos i empesaron a kantar. Ke ermozo… unas kantikas muy presyozas seya en turko seya en otras linguas. Por siguro ke son todos u elevos u eskapados de konservatuar por no topar echo i ganar dos tres groshes toparon este kamino. Estava tan ermozo demanyana de sintir una muzika ermoza no entendi komo pasaron 20 puntos fin ke abolti la kara, el vapor ya akosto al porto de Kadıköy. De aya un ermozo kamino en el bodre de mar i arivi a Moda ande mi ijo. Kijo dizir ke no valyo la pena ke no durmi tantas noches.
Al otro diya de retorno tomi el mezmo vaporiko en supito rankontri una konosida ke bive enfrente. Estava muy albonoza i eksitada porke se estava indo a tomarlo a su ijo del aeroporto ke iva vinir de Los Angeles i ke ay dos anyos ke no lo ve.
Kon el anons ke ya vinimos a Kadıköy i yo me vine en mi i ize loores al dyo ke mi ijo mora en Moda!
