El mas presyozo amor de muestra vida: La Madre

El teksto anonim ke vash a meldar me fue embiyado por un lektor. No se si es una konseja verdadera o imajinarya. Tresladi del turko, estas linyas de emosyon ke kontan de boka de un ijo.

Coya DELEVİ Judeo-Espanyol
22 Mayıs 2019 Çarşamba

Kada anyo kaji, en diferentes publikasyones en Judeo-Espanyol, no manki de eskrivir unas kuantas linyas sovre muestras madres, sovre todas las madres. I oganyo tambien, aserkando el “Diya de la Madre” kije no mankar a este uzo.

Naturalmente kada madre es unika para sus ijos. No se puede enyegar ke ser madre es sinonimo de “Devuamiento”. Ay syertas madres ke izyeron la “Abnegasyon sus manera de bivir, asta sakrifikarsen, komo el akto sublimo de una madre antes 3-4 anyos en Bingöl, sivdad al Este de Turkiya. Una madre manseva ke, vyendo un teroristo pronto para lansar una bomba, se echo delantre sus dos kriaturas, ekspozandose a una muerte terrivle…

Ser Madre… Otruna vizyon ke me kedo plantada en mi memorya, afilu ke paso munchos anyos. Myentres el Ayuno de Ramadan, una manseva, en el zifo de la madrugada, vestida de un “jeans”, anorak i kasketa, probablemente para darse una aparensya maskulina i lo mas enteresante, un davul enkolgado al ombro. Malgrado el friyo, malgrado los perikolos de la eskuridad, esta batyendo el davul para espertar los muzulmanos ke deven ampesar un muevo diya de ayuno. Ansi esta madre espera ganar unas kuantas liras de bahshish…  

Agora keridos lektores, el teksto ke resivi de un lektor: “La idea de mi mujer de salir yo kon una otra, me sorprendio kuando me disho una noche: “Ya se ke la keres muncho. Le deves apartar tyempo i a eya.” Naturalmente, en primero protesti en dizyendo a mi mujer ke eya sola es mi grande amor. A la fin, entendi ke se tratava de mi kerida Madre, bivda desde 19 anyos... Ansi, despues de 22 anyos de vida konjugal, mi mujer reusho a topar el kamino de konservar biva la senteya de muestro amor...

En el bulush de la vida, de mi lavoro, de las esperansas de mis tres ijos, es verdad ke aviya bastante neglijado mi madre. La bushki kon la instigasyon de mi mujer, para envitarla alguna noche a komer afuera i al sinema. Kedo enkantada al grado de demandarme kon kuryozita, si alguna koza no estava kaminando bueno! Mi madre era de estas personas ke supsonan un malor de un telefon en oras de echar i detras, una envitasyon non abituala! La kalmi en dizyendole mi dezeo de pasar unas kuantas oras kon eya. Intrigada me demando: “Solamente tu i yo? I despues de un momento de refleksyon, acheto.

Fui a tomarla, ya estava asperando pronta en la puerta, bien vestida i bien kuafada. Remarki su nyervozidad igual ke la miya. Me arresivyo kon una sonriza en su fizyonomiya luminoza komo un andjelo: “Les dishe a mis amigas ke va salir kon mi ijo. Deven estar despasensyozas de sintir lo ke les va kontar!”. Entrimos al restorante, eya kon un ayre, una grasya de reyna. Le meldi el “menu”, eya no pudiendo atinar las letras chikas. Sospirando kon una ekspresyon nostaljika me disho: “Kuando eras chiko era yo ke te meldava el menu...”

Tuvimos un ermozo moabet myentres i despues la komida avlando del pasado i de las kozas muevas de la vida. Komo ke keriyamos ratrapar los anyos pyedridos... Avlimos tanto ke no mos apersivimos afilu de la ora del sinema ke ya aviya pasado. En deshandola a su kaza me disho ke keriya salir otruna vez kon mi, a kondisyon de ser yo su invitado. Dechidimos de toparmos en serka.

En kaza mi mujer me estava asperando, kuryoza ma no keryendo pareser komo tala! Le konti komo paso muestra nochada... Una nochada muncho mas ermoza de lo ke pudiya esperar. Pasaron unos, kuantos diyas... Mi madre tuvo una seryoza kriza kardiaka i la pyedrimos. Aviya akontesido tan supito, ke no tuve entervalo, dinguna shans de azer alguna koza para eya.

Paso un syerto tyempo. El restorante ande aviyamos komido, me mando una faktura “pagada” djuntos una kurta letra eskrita de la mano de mi defunta madre: “Kerido ijo, pagi de avans esta faktura porke estava yo syen por syen sigura ke no iva pueder alkansar al rendez-vous ke dechidimos los dos. Portanto, aranji un “dine” de dos personas. Kero esta vez ke estes kon tu mujer. No te vas a pueder nunka imajinar lo ke sinyifiko las oras ke pasimos tu i yo... Te kero muncho...”

Keridos lektores, estas linyas estan konfirmando la importansa de dizir “te kero bien”, de apartar tyempo a las personas de muestra vida ke lo meresen. Porke en vida, nada es mas importante ke la famiya. Daremos a eya el kudyo i el tyempo ke es su derecho. No pensaremos ke tenemos el lukso de atrazar esto para un “otro momento”, un momento ke puede ayegar muy tadre...

 

Siz de yorumunuzu yapın

Tüm Yorumları Görün