Eliz Gatenyo
Anoche, el 18 Mayo 2019 uvo el konkurso Eurovision en Tel Aviv, Israel. Semana entera mos amostraron a grupos a grupos todas las kantikas ke partisiparon porke aviya munchos payises. Kada noche eliminaron unas kuantas kantikas kon votos i a la fin kedaron solo 26 kantikas de los 42 kandidados, ke ivan a kompetir en el final.
El konkurso de kantikas Eurovision ampeso en primero en 1956. Inspirado del festival de San Remo, kijeron azer un festival de kantikas ke konteniya la Evropa entera. La Turkiya partisipo por primera vez en 1975 kon la kantika “Seninle bir Dakika” ke kanto la kantadera Semiha Yankı. En 2003, Sertap Erener mos izo ganar el konkurso kon su ermoza boz, ermozo Show i ermoza kantika “Everywhere that I can”. Desde 2013, la Turkiya mas no kijo partisipar al Eurovision por kavza ke akel anyo trokaron las reglas del konkurso. Komo no partisipo la Turkiya, dingun kanal turko no difuzo este konkurso. Por esto lo suivimos del kanal italyano RAI1.
Komo ya vos eskrivi mas ariva este festival de la kantika se fiesto en Tel Aviv, Israel por ke el anyo pasado la kantadera Neta Barzilay aviya ganado el premio kon su kantika “I am not a Toy”. Los amigos ke moran en Tel Aviv mos kontaron ke nunka no aviyan visto este modo de spektakolo en las kayes, kon tantos partisipantes i turistos, bandyeras, kolores, vistimyentas, kantikas i bayles.
Vineremos a anoche. El konkurso ampeso a las 10 de la noche. Kada payis ampeso kon sira a salir a la shena a performar su kantika i su bayle. Israel gano muncha estima del mundo entero de la teknolojiya en el Show. Las luzes, las animasyones virtuales, las flamas artifisiales, la muzika todo estava una maraviya. Entre las kantikas mos amostraron los diferentes lugares de Israel. Esto fue una grande okazyon para azer konoser el payis i una ermoza publisita para atirar los turistos.
Antes ke ampesen los votos, para deshar a los juris tiempo para pensar, vino a la shena Madonna kon su grupo i izo un spektakulo fantastiko.
Despues de Madonna ampesaron los votos. Kada payis voto a su gusto. I a la fin la Ollanda fue el ganador de Eurovision 2019. Italia fue el sigundo payis. Israel este anyo kedo en el 23en posto.
Este anyo ya se eskapo, esperamos verlo i a los anyos ke vienen este program ke miramos kon muncho plazer.
