“Pesah” es antes de todo la komemorasyon de la salidura de Ayifto, de akseptar (al presyo de munchas difikultades i sufriensas) la insertitud de un egzodo al pareser interminavle, komo un largo enkaminamyento en direksyon de la libertad ke ekspresa el ermozo orgolyo i el immenso dezeo de estos ombres i mujeres de ser enfin “umanos independyentes en sus refujos de syempre abokar la kavesa delantre el enemigo”.
Munchos livros mos kontan los dolorozos esforsos ke eyos tuvyeron de azer durante sus tyempo illimitado en el dezyerto, los ojos kontinualmente fiksos sovre el movimyento de las nuves en el syelo, afin de topar eyos mizmos el kamino derecho.
De mezmo, Pesah mos anunsya el tyempo de arekojer lo sembrado, lo ke es el endisyo de una populasyon ke (malgrado su destino de ser un punyado de umanos en kontinual migrasyon) tenia syempre en eya mizma ‘el eskarinyo intenso i la vokasyon de devinir una ‘Nasyon Estavle’ sovre una Tyerra ke sera la Suya.
La siya en el entorno de la meza familyal ke muestros ansestros deshavan inokupada asperando la venida del profeta “Eliau” i la puerta de la kaye ke kedava medya avyerta para el pasante ke kereria entrar i paskuar kon eyos, ekspresan el ovligo de solidaridad i de hospitalidad entre todos los myembros del puevlo djudyo.
Si… la fyesta de Pesah es sin dubyo esto todo, i tambyen (lo ke es muy importante) el rekuerdo ke durante los 40 anyos de soledad en el dezyerto, muestros primeros abuelos resivyeron de la mano de sus giador “Moshe Rabenu” un regalo en mizmo tyempo relijyozo i etiko-sosyal, “El Dekalogo”, los “Dyes Komandamyentos”, ke afirman muestros doveres no solo en direksyon de Dyo ma igualmente en direksyon de kualkyer kriansa umana kuala sea su Fey, lo ke mos konfirma la Biblia, de los ‘Syete komandamyentos de Noah’ destinado partikularmente a los ke no son djudyos afin de indikar ke ‘todos los ke lo observaran’ seran syempre konsiderados komo djustos entre los djustos, todo komo los djudyos ke observaran las preskripsyones del “Dekalogo” para ser una nasyon. Esto es el nasimyento de la nasyon djudiya. Es la fyesta de fundar un pais muevo, de la unyon i de la solidaridad.
Sea riko, sea prove, todos somos iguales en el doredor de la meza de seder. Es la fyesta ke ambezamos muestras tradisyones a muestros ijos i ijas. “Pesah” es el indisyo de la ESPERANSA. Mos aze akodrar ke nunka no kale ser dezesperados, mos konseja de ser syempre yenos de esperansa, porke muestro Bendicho Dyo mos ayuda en los momentos los mas difisiles. El nombre del imno nasyonal de Israel es “HATIKVA”, ke kere dizir Esperansa.
Todas las famiyas se arekojen en el doredor de la meza de seder i se akodran de la leyenda de sus ansetros i transferan la istorya de jenerasyon en jenerasyon.
“HAG HA MATSOT”. “Pesah” mos aze akodrar la proteksyon santa mirakoloza ke en la katastrofa Dyo detuvo a los ijos de Israel leshos de los afedentos. “Hag ha Matsot” mos akodra ke en esta semana sakra, vamos a komer solo matsa ke se aze de arina sin levadura.
Las fyestas son las okazyones de aunar a todos en el entorno de una meza. Madres, padres, ijas, ijos, nonas, nonos, inyetas, inyetos, tiyas, tiyos, kosfuegros... I en la meza se desha syempre una siya vazia para ke “el ke tyene ambre venga i koma”.
SEDER es la regula de la meza ke se apareja en las kazas djudiyas por la noche de fyesta kon muncho hen. En la meza se topa los livros de la Agada, vazos de vino para todos i un plato espesyal de seder. Se mete enriva de un tifsin; un guevo haminado, tres matsas enteras, un pedaso de kodrero kemado, haroset, karpas i maror. Es una felisidad grande de arekojer toda la famiya akeya noche.
Syempre aunados i “HAG PESAH SAMEAH”.
