Eliz Gatenyo
La semana pasada todas las televizyones i las radyos estavan pasando un haber muy emportante. Se estava kemando la katedrala Notre Dame en Paris. Esta katedrala era unos de los simbolos de Paris. Komo la Torre Eiffel, el Sacre Coeur i mas. Miliones de turistos se van a ver esta ovra istorika. Verdadmente no se puede kreyer la persona ke esta katedrala fue fraguada en 200 anyos. Se ampeso a fraguar en el tiempo de el rey Louis VII en 1163 i se eskapo en el tiempo de el rey Philippe VI de Valois en 1345. En enterval de estos 200 anyos kada arkitekto ke viniya, a su torno aziya una parte de la iglesia a sigun su gusto. Napoleon Bonaparte resivio su korona en esta katedrala. I en Augusto 1944, sonaron las kampanas a la lokura kon grande alegriya para anonsar la fin de la Sigunda Gerra Mundial.
En lo ke vieron ke iva ser muy difisil de amatar este fuego, ampesaron al menos a pueder salvar los objektos presiozos ke puediyan salvar. Ampesando por las statuas, dokumentos eskritos de mano, Biblias dekoradas kon eskrituras de oro, kruses de tavla lavoradas kon oro i sedef i la korona de Hristos, echa de kablos kon punchones i klavos, la ke visatiya en lo ke fue krusifiyado. En esta katedrala tambien se topa un org muy muy grande de 8000 tubos. Komo dainda no se izo el envanter del fuego, no se save egzaktamente la grandeza del danyo. El prezidente Macron disho ke van a fraguar esta katedrala de muevo egzaktamente komo la orijinala. Por esto uvo miliones de Euros en donos.
Ize un rezumen ensima de este monumento, un arte maraviyozo.
Agora vos kero kontar otra koza. Saviyash ke esta katedrala fue un sentro de salvasyon para los ijikos judios en el tiempo de los Nazis? 8000 kriyaturas judias fueron guadradas en los bodrumes de esta katedrala i por los koridores sekretos fueron fuyidos a la Suiza i a la Espanya. Los grupos subterraneos fueron ayudados por los papazes de la eglisia i malgrado ke ya saviyan ke si se aferravan ivan a ser matados, no se arepintieron. Tambien el grupo fransez kontra los Nazis, “La Resistance”, jugo un grande rolo en esta fuyida.
Munchos anyos antes, en lo ke vijitimos esta katedrala, vimos un grupo fiestando un evenimyento. Mos aserkimos i vimos ke dos viejizikos estavan selebrando sus 80en aniversario de boda.
Este edifisyo no es solo una katedrala kristiyana, ma es un patrimonyo de la umanita entera.
