Müzayede/Subasta

Judeo-Espanyol
3 Nisan 2019 Çarşamba

Keridos i Keridas,

Antes tres diyas me fui a un evenimyento muy enteresante. Me topi en un müzayede muy amable i simpatiko. En los müzayedes se venden bienes, muebles portables i non-portables. Los bienes se venden al merkador ke ofre el mas alto presio. Se venden artikolos antiguos u raros. En primero se ekspozan unos kuantos dias mas antes por mostrarlos a los ke se enteresan a merkar. El diya del müzayede los ke keren merkar tyenen en la mano velikas kon numeros ke reprezentan la persona. El ke kere alevanta la vela i puja el presyo del artikolo. I es ansi ke me fui a un müzayede ke fue organizado por Semih Eser i Jak Treves. Semih es de famiya ombre de müzayede. El es direktor en un otel grande en Kapadokya i en mizmo tyempo es antikaryo i libraryo. Jak es un koleksyonaryo de numismatismo, de efemera, de livros. Su nombre pasa en el livro de los sien primeros koleksyonaryos de Estanbol. Arekojer fue una pasyon para el, ma agora se desido de partajar lo ke arekojo. En jeneral los rikos se enteresan a merkar estos artikolos. Ma esta subasta fue muy modesta porke el buto era de azer plazer el koleksyonaryo a la djente i de pueder merkar lo ke le plaze a presyos muy bashos i de pueder pasar un buen tyempo kon amigos i keridos. En este pensamyento la organizasyon de Semih i Jak paso kon grande emosyon i guste i plazer i kon rizas. Todos los envitados kedaron muy kontentes de pueder merkar lo ke dezeyavan.

I ansi alkansaron a sus butos. Al vermos.

Siz de yorumunuzu yapın

Tüm Yorumları Görün