Folar de Purim

Dora TREVES Judeo-Espanyol
20 Mart 2019 Çarşamba

Purim este anyo mos vyene el 21 Marso, diya de jueves i empesa en meldando la Megila de Ester i akodrandomos de Mordehay.

Kada primavera me vyene una palpitasyon i guste al korason ke ya se estan aserkando Purim i Pesah. Kualo se va aparejar, kualo se va gizar, kon ken se va fyestar estas ermozas fyestas.

Purim me aze akodrar de los biskochos triangulares i del folar de mi chikes. Folares ke ornava ni gramama Vida Sağız i ke mi granpapa Gazi Yuda mo los trayiya a Estanbol de Bursa. Mashala, para kada inyeto aziya un folar i mos metiya parayikas en la aldikera. Ke guste ke era kuando viniya el kon los folares. Aparte de esto se aziya “platikos de purim” ke es dar a gustar i gostar a los myembros de la famiya i a los menesterozos. En estos platikos se metiyan syertas dulsuryas i folares. Me parese ke muncha djente no saveriya lo ke es folar.

Folar es una forma de pan dulse, una forma de biskocho de rais portugez i sefardi asemejando al churek. Aryento se mete un guevo haminado i se kuvre kon bandas ke reprezentan Aman el Vizir malo en prisyon.

Vos kero dar la resefta de folar ke dainda tengo la savor en la boka.

Ingredientes:

30 gr de fermente, 1 kilo de arina, una kuchara (de dulse) de sal, 2 kupas de asukar, 20 gr de polvo de kanela, 1 paketiko de vanilya, 300 gramos de agua tivya, 1 kupa de azete, un guevo haminado, guevo para untar ensima kon furcha.

En primero se forma una masa de pan. Se amasan los ingredientes para obtener una masa uniforma. Se desha repozar 2 oras para ke la levadura se fermante i se forme una ermoza masa.

Se aparta un poko de masa para los sherites. El resto de la masa se forma komo koka u komo un redondo, se mete los sherites ensima del guevo emplantado en la masa. Se unta ensima lo amariyo del guevo. Se orna 20 minutos en el orno kayntado a 180 grados.

Ke vos aproveche kon salud i beraha. Para kada anyo fyestaremos el Purim kon alegriya i todos djuntos.

Al vermos.

Siz de yorumunuzu yapın

Tüm Yorumları Görün