Los Tyempos Presyozos De La Maturidad

Dora TREVES Judeo-Espanyol
6 Mart 2019 Çarşamba

En pasadas mos reunimos kon las amigas de eskola. Syertas amigas ay puedeser mas de trenta anyos ke no las aviya rankontrado. Eyas todas fueron una partida de mi pasado. Anyos paso, kada una se fue en su kamino. Ken topo el kamino derecho, ken se yerro. Yo no supe muncho kualo me ambezi de la vida. Djusto en akeyos diyas pensando a esto, una amiga me embiyo una eskritura ke apartyene al famozo poeta, muzikologo, istoriador, fotografo i novelista brazilyano. El bivyo entre los anyos 1893 i 1945.

Keriya partajar kon vozotros unas kuantas linyas de lo ke eskrivyo sovre “El Presyozo Tyempo de la Maturidad”. “Maturidad” para no dizir “Vejes”. No mos bozdeyaremos los morales porke mizmo si es vejes, kale ser muy mazalozos para bivir la vejes. Enfin, viniremos a las dichas de este sinyor poeta.

“Konti mis anyos i topi ke tengo mas poko tyempo para bivir ke de lo ke bivi fin asta agora. Me syento komo akeya kriyatura ke gano una bolsika de dulsuryas. En primero las dulsuryas las komi presto presto kon muncha savor, ma kuando me apersivi ke ya se apokesyeron, empesi a komerlas i a savorarlas kon mas repozo i trankilidad. Agora no tengo muncho tyempo para reunyones interminables, ande se avla i se diskuta de reglas i de leyes savyendo ke no syerven a nada mas para mozotros. No ay tyempo de suportar a personas absurdas ke malgrado ke ya son bastantes aedados no se engrandesyeron. No kero estar mas kon djente ke tyenen grandeza i egos auflados. No tengo pasensya de estar kon personas selozas ke dan danyo al deredor. El esansyel es ke keriya estar kon djente de valor porke en la bolsika no me kedo mas munchas dulsuryas. Kero bivir al lado de djente umana, kon la djente ke save riyir de sus yerros i kita lisyones de sus yerros, kon la djente ke no se konsidera elekta antes de serlo i ke dize “yo ya so, yo ya me ize”. Kero estar kon djente ke no se fuye de sus responsibilidades. El esansyel es ke la vida valga la pena de bivirla i tener a mi lado djente ke saven tokar al korason de las personas. No kero peryer las dalkavos dulsuryas ke me kedaron. Esto muy siguro porke las ke me kedaron seran las mas savrozas de las ke tengo komido fin agora.

Espero ke i lo mizmo sera para vozotros.

Al vermos kon sanedad i alegriya.

Siz de yorumunuzu yapın

Tüm Yorumları Görün