Un vapor eskalavrado estava partiendo del porto de Constanza, Rumania.
En esta nave estavan los djudios fuyendo de la Rumania antisemita, i esperando ayegar a la Palestina debasho el kontrol de los Inglezes akeya epoka. I, esta nave fue la tomba de los 768 de estas personas.
El kavzo Struma durante anyos solevanto polemikas i syertas espekulasyones. En el anyo 1964, un istoriano Alman disho ke un sumaren ruso fue el responsavle de la undisyon de Struma, i, esto fue achetado por los sovietikos. Ansi, mientras la gerra, todos los sumarenes rusos aviyan tomado el orden de undir toda nave sospechoza entrando a la Mar Preta. El ruso estava suspechando los Nazistos ke, via la Mar Preta, estavan entrando armas ariento de Russia. Ansi, se deklaro ke el sumaren Schuka 213 fue el responsavle. En el 24 Febrero 1942, la nave Struma fue ansi undida kon sus 768 pasajeros. Solo uno pudo sovrebivir: David Stoliar ke fue salvado al punto de alkavo. Akel tyempo David Stoliar era un joven 19 anyos.
En el 24 Febrero 2019, este anyo, estamos nombrando el 77en anyo del dezastre Struma. La ruvina de la nave esta dayinda en el largo de Shile.
