Un Tu Bishvat alegre kon El Pintor ISAAC LEVITAN

Keridos lektores, pensi ke los pintores ke saven transferarmos en otros mundos i darmos el mesaje de “EL BIEN, LA BEYEZA, LA VERDAD” meresen un artikolo mas detalyado...Vos sueto un alegre Tu Bishvat kon los peysajes de muestro famozo pintor.

Esti SAUL Judeo-Espanyol
30 Ocak 2019 Çarşamba

En Disembre de 1985, estuvimos en Rusya. Tuve un plazer immenso de toparme en Moskova, Leningrad, oy St. Petersburg, sivdades enteresantes i elegantes.

Vijitando el Muzeo de l’Ermitage de Leningrad, mis ojos se fiksaron ensima de un ermozo livro en la biblioteka, intitulado Isaac Levitan, kon letras majestuozas. Me felisiti de deskuvrirlo entre tantos livros. El livro presyozo debasho de mi braso, kon la inyeve, kaminimos ensima de la Mar Baltika entezada.

Vos envito a dar un salto al norte de la Rusya, en Lituanya, ande el famozo pintor-peyzajisto Levitan (XIX siglo) egzekutyó la mayor partida de sus ovras.

La Mar Baltika la konosi kon su kuvyerta o mantó blanko, esta misma Mar, kon el desyelo, mos amostra un peyzaje enkantador, endorado i resplandesyente, ke konosi kon la paleta de Levitan – kon su primavera soleada. El pintó muy poko el invyerno. Malgrado esto, un kritiko de arte mos dize: “Dinguno antes de el, no supo dar tanta kolor a la inyeve.” I kontinua: “Levitan krea i avre un muevo kapitolo en la istorya de la pintura Rusa, komo en Fransia los pintadores de la Eskola Barbizon (Les Peintres du Plein Air – Les Impressionistes), ke se opozan al akademizmo.

El artisto aferró lo ermozo real de la natura i la luz ke sentiya komo estreyas sovre la Volga. Su kapachidad estetika mos aze sintir la melodiya del ritmo grasyozo del movimyento de la agua, komo si las olas flörtavan kon la kosta. Luzya fauna reproduzida kon maestriya i la istorya del lirizmo de la vida de Rusya, kon idyomas artistikas, para transmetermos sus emosyones espontaneas.

Debuta su karyera en prezentando la verasita i la egzaktitud, kon su manera de pintar “tal kual”. En avansando en su kamino artistiko, stiliza sus tuales.

Su Vida

Isaac Ilyich Levitan nasyó el 18 de Agosto 1860 en Kybartai (Vilkaviskis), en Lituanya. Su padre, ombre kalmo, empyegado del shemendefer (treno), no solo estudyó en el semenaryo rabinikal, tambyen se ambezó linguas en Kovno ande bivyó, ensenyó el fransez i lavoró en la firma “French Construction Co.” komo interprete. En 1870, la famiya Levitan se enstala en Moskova, kon sus dos ijos i dos ijas. Sus buto era de edukar i elevar mijor a los ijos. Kuando a 15 anyos peryó su madre i dos anyos despues su padre, no peryó el meoyo, malgrado ke estuvó muy afektado.

En Septembre de 1873, Levitan fue akseptado a la Eskola “Moscow School of Painting, Sculpture and Architecture”. En el jurnal Russkiye ve Domoski meldamos ke una ovra de Levitan resive una madalya de plata en 1878 i otruna en 1881. Partisipa el mismo anyo a una ekspozisyon miksta en Paris, kon sus amigos Nesterov, Korovin, Lebedev, ets. Sus ovras “View of the Simenov Monastery” i “Autumn Day” serán merkadas por el grande Galerista Pavel Tretyakov.

Levitan viaja en la Evropa por la tresera vez, en Italya, Suiza i Almanya. En Viena, vijita la Sézession Exhibition, ke trae uno de los mas importantes koryentes muevos. No solo es pintador, es tambyen elevo briyante i ekselente profesor. Aksepta de ensenyar en Moscow School of Painting, dando una baza solida, inovatora, komo su suksesor Apollinary Vasnetsov.

Su grande amigo inseparavle, Anton Chekov, eskrivano reputado, i su famiya, los konosyó en 1885, en Maximovka. Vizinos d’enverano, Levitan i Chekov tyenen la misma afinidad por la natura i es esto ke los unisa. Sus ideal komun es de relevar la emosyon umana. Chekov se interesa tambyen en la salud de su amigo, ke sufre del korason. Chekov prezenterá su amigo en uno de sus livros (Particoloured Stories).

En akeyos anyos, munchas manifestasyones artistikas tyenen lugar en Rusya. Entre estos, Levitan aze parte de los personajes markantes de la Rusya i del mundo. Los Muzeos de Moskova i Leningrad son ornados de sus ovras.

 

Siz de yorumunuzu yapın

Tüm Yorumları Görün