Un istoryano disho ke la Fransya avrira el muzeo Dreyfus en la kaza de EMILE ZOLA

Metin DELEVİ Judeo-Espanyol
23 Ocak 2019 Çarşamba

La semana pasada vos eskrivi sovre Emile Zola i de la letra ke aviya mandado al Prezidente. En mirando los haberes pasados enkontri este avizo ke es muy sinyifikante i importante por el sujeto ke trati.

En este avizo se dize ke un sityo ofisyal para onorar Alfred Dreyfus, el djudio persegido indjustamente se inogurara en el otonyo de 2019 en los suburbos de Paris. Un istoriador importante disho ke empesaron los preparativos para avrir un muzeo del estado en Fransya para el ofisyer djudio de la armada, Alfred Dreyfus, mal persegido.

El muzeo Dreyfus avrira sus puertas en el proksimo otonyo aryento de la Kaza Emil Zola en Medan, en los suburbios de Paris. Esta kaza es un monumento, un muzeo ke avriyo sus puertas en 1984 para onorar el eskrivano, ke defendiyo los derechos de Dreyfus, publiko una letra, la letra intitulada “J’accuse” i por modo de esto fue kondanado.

Los planes se anunsyaron en una entrevista kon Alain Pages, un profesor retirado de istorya de la Universidad de Sorbonne ke edita la revista “Cahiers Naturalistes” i el sityo web sovre Zola. Esta entrevista fue publikada en el sityo web del CRIF,  grupo ke reprezenta las comunidades djudias fransezas.

En parte grasyas a las protestas de Zola, la kondanasyon de Dreyfus en 1894 despues de una pretensyon de traisyon, fue tratado internasyonalmente komo un yerro judisyal bazado sovre prejuisyos antisemitas. Este kavzo se izo un simbolo de la lucha kontra el antisemitizmo. En 1899, Dreyfus fue pardonado por el prezidente fransez i liberado, i en 1906 un komisyon militar lo egzonero ofisyalmente.

El plan para estableser un muzeo para Dreyfus, donde el djuzgo sirvyo de katalizador para la kreasyon del estado de Israel, fue anunsiyado para el mez de Marzo por el presidente fransez Emmanuel Macron.

Ma esta desizyon no es mueva. En 1907, la bivda del eskrivano Émile Zola regalo su kaza a la Assistance Publique en Fransya, i en 1984 dyo la otorizasyon para konvertir la kaza en muzeo. Ma akel tyempo, no se toparon fondos sufizyentes para realizar este projekto. François Mitterrand, ke keriya prezervar el sityo, demando a Pierre Bergé, un muzeologo importante, ke asegure de la direksiyon. Despues de azerse el administrador de la kaza en 1999, Bergé empeso a azer planes para el muzeo.

En 2011, anunsyo ke empesaran los lavoros de renovasyon en la Maison Zola i ke en este mizmo edifisyo tambien se va estableser un Musée Dreyfus. La kaza fue inogurada por el prezidente François Hollande el 2 de oktubre de 2016. Akeyos diyas los planes eran ke el Musée Dreyfus se avrira al publiko en el otonyo de 2018. Estos planes se estan realizando agora kon un rotar de un anyo.

Para Bergé, este muzeo es parte de su kompromizo i un instrumento para la lucha kontra el antisemitizmo en un tyempo ande la intoleransya se esta engrandesyendo.

“Lavori por la Maison Émile Zola prinsipalmente por el kavzo Dreyfus. Si bien, en mi opinyon, Zola no fue el mijor eskrivano del siglo XIX, ma fue, sin dubyo, uno de los ombres ke mas me emosyono. Komo disho una vez Anatole France, i repeto sus palavras, Zola fue “un momento en la istorya de la konsiyensia umana”.

 

Siz de yorumunuzu yapın

Tüm Yorumları Görün