Trezoros de muestra lingua

La relasyon entre padres i ijos / ijas siempre fue un buen sujeto en las dichas i proverbos / refranes de muestra lingua. Kereriash akodrarvos de unos kuantos ke son konosidas por sus savrozor i realidad?

Judeo-Espanyol
7 Kasım 2018 Çarşamba

Fani Ender

 

Siertos de eyos son reeles i djustos en muestros dias tambien. Porke el ser umano no troko a traves los anyos.  Espero ke vos gustaran i vos azeran pensar, todo en aziendovos sonreir:

* Tres ijas i una madre, kuatro espinas para el padre. (Al tiempo, las mujeres no lavoravan afuera de kaza i el padre teniya ke mantener i kudyar el solo para toda su famiya)

*Una ija - una klavina, dos ijas konjura, tres ijas, guay de akel padre! (Endemas de mantenerlas, dever de dar dota a tres ijas no era koza fasil.)

*Un padre para sien ijos, i no sien ijos para un padre.  (Los padres son siempre prontos a kudyar por sus ijos ma los ijos no tienen ni tiempo ni grande voluntad para los padres, siendo ke eyos tienen sus proprias famiyas)

*Kuando da el padre al ijo, riye el padre i riye el ijo. Kuando da el ijo al padre, yora el ijo i yora el padre. (Es muy difisil i triste para un padre de asperar kudyo i moneda de sus ijos.)

*Ven aki sinyor padre, te ambezare a azer ijos. (En vezes los mansevos no keren entender ke los ayedados saven bastante mas ke eyos i los despresian.)

*Padre eskaso, ijo ladron.  (El ijo de un padre ke no da bastante a sus ijos, los ovliga a bushkar otros remedios…)

*A padre guadrador, ijo gastador.  (Mas el padre es eskaso, tanto es el ijo gastador i mano burakada.)

*Oye ijo mio el konsejo de tu padre, i no te aleshes de la ley de tu madre.  (En la relijyon djudiya, es la kreensia de la madre ke tiene primurya.)

*Padre es el ke mantiene i no el ke endjendra. (Siertos padrastos son munchas vezes mas kerensiyosos i kudyosos ke el padre biyolojiko aleshado o no bivo.)

*El padre peka, al ijo se le apega. (Los ijos a vezes deven de pagar por los yerros de sus padres.)

*El padre komyo agras, al ijo le erguelyeron los dientes. (Mizma sinyifikasyon del proverbo de arriva, las kulpas de el padre son la erensiya de el ijo.)

*Bienes de mi padre tapan mi korkova. (Los defektos de ijos / ijas de famiya rika o poderosos se ven manko i son mas akseptables.)

Siz de yorumunuzu yapın

Tüm Yorumları Görün