No egziste edad para el desvelopamyento personal

No egziste edad para el desvelopamyento personal

La persona puede ambezarse munchas kozas en diferentes puntos de vista en kada edad. Por egzempyo, un profesor kale ke se ambeze kontinualmente.

“Un profesor ke ve su mankura, i kompleta su saveduriya, es kandidato a la reushitad”. BACON.

En el dor ke bivimos la konosensya (bilgi) es la koza primordiyal (en önemli) de muestra egzistensya. Lo ke mos estamos ambezando, se esta envyejesyendo kada anyo. Por esta razon, la persona kale ke se renovele (yenilenmek) kada anyo.

Mizmo la persona la mas perfekta no kale ke tenga konfiensa en su saveduria, kale ke valorize la konosensya del den frente i ke la tome en konsiderasyon.

Las aparisyones (görüntüler) i las bozes se estan indo al punto al mas leshos ke puede egzistir en el mundo kon la ayuda del kanal del telefon, radyo, televizyon, kompyuter i otros medios elektronikos. Las personas estan viyajando en unas kuantas oras, estan pasando los oseanos (okyanus). Esto todo mos esta amostrando la situasyon ande vino el desvelopamyento (gelişim).

La persona ke termina la universitad i toma la diploma, sin meldar livro no puede kontinuar su profesyon. Mizmo ke son espesyalistos en sus ofisyos, tyenen la ovligasyon de renovelarsen.El ke no se kultiva de si para si, no puede edukar a las otras personas. La fuersa de la veluntad, de la rezolusyon (azmin gücü), no puede detener a la persona, kon esta fuersa ke desbodra (taşmak) de aryento, esta persona mizmo puede reushir a todo modo de koza ke dezea. Por egzempyo; mos akodramos de lo ke keremos akodrar.

Para pueder ambezarmos de kavesa lo mas mijor es de adjuntar una idea kon la otra. Kale tener konfiensa en la memorya.

En primero kale desvelopar la sanedad mental i spiritual. La sanedad mental i spiritual son el komporto ke tenemos kon el den frente. Lo mas emportante es ke la persona kale ke se de, de si para si la valor i el merito ke merese i kale ke se aksepte kon las manyas buenas i negras.

Para desvelopar el meoyo ay munchos kaminos. Para valorizar el tyempo libero, por egzempyo, en asperando en una klinik de un doktor, u indo kon el otobus a un lugar leshos, meldaremos un livro. Mos ambezaremos una lingua estranjera. Eskrivir es util por el meoyo. Las notas, las poesias u las konsejas ke eskrivimos pueden arrezyar (güçlendirmek) el meoyo.

Azer movimyentos, spor, kaminar presto, respirar el aver limpyo, mos avre el meoyo.

Para pueder ambezar mas mijor, antes de meldar i despues, kale tomar notas, enriva de un papel, para no olvidarmos.

Yo penso ke kale estar kon personas ke son kreativas, intelijentes i produktivas. Riyir, djugar djugos entelektuales, kantar, estar leshos del stres de kadal diya, son los prensipyos del desvelopamyento. Estaremos pozitivos i kereremos byen al den frente. Kero terminar kon una konseja. Dos personas estavan kortando arvoles en una shara (orman). La primera se estava alevantando temprano kada demanyana, estava ampesando a kortar, kuando eskapo un arvole, estava pasando al sigundo i estava kontinuando fina la noche. No se estava repozando entrel diya, no estava komyendo i no se estava apartando tyempo libero para si. Estava lavorando komo un perro sin tomar reflo. I las noches, kuando el sigundo se estava indo a su kaza, el estava kontinuando a kortar otras tres oras. El sigundo se estava repozando un poko entrel diya, i kuando viniya la noche ke el tyempo se estava ariskuresyendo, se estava indo a su kaza. En enterval de una semana, los dos lavorando kon este ritmo, ampesaron a kontar kuantos arvoles kortaron.

El rezultado: El sigundo ombre korto mas munchos arvoles. El primer se inyervo.

“Komo puede ser? Yo lavori mas muncho. Ampesi a kortar mas presto ke ti; eskapi mas tadre. Ma, tu kortates mas muncho. Kualo es el sekreto de este echo?”

La sigunda persona respondyo kon una sonriza (tebessüm).

“No ay un sekreto. Tu lavorates sin respirar. Yo me repozi un poko i aguzi (bilemek) mi chuela (balta). Kon una chuela aguzada, se puede kortar mas munchos arvoles kon poko esforso.

Desveloparmos es aguzar muestra chuela. Kale apartarmos para mozotros propriyo el tyempo, i para kompletar muestra saveduriya en los espasyos ke estamos flakos, kale ke mos esforsemos (çabalamak).

Esto es la kondisyon la mas emportante para arrezyar el meoyo, la alma i el karakter.

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın