kanada REklam

El Dia Evropeo de la Kultura Djudiya

El Dia Evropeo de la Kultura Djudiya

“El Dia Evropeo de la Kultura Djudiya” se esta organizando desde el anyo 1999 fina oy en 35 diferentes paizes del mundo. El 14.10.2018, alhad se selebro en la Sinagoga “Neve-Shalom” i en el Muzeo de los djudyos ke biven en la Turkiya.

La komunidad (toplum) djudiya turka, ke ay mas de 500 anyos ke bive en este pais, organizo un dia yeno de aktividades diversas para azer konoser a los turkos la kultura djudiya, las tradisyones, la lingua espanyola ke no se esta utilizando muncho entre los mansevos, las kantikas, los filmos dokumentales, las ekspozisyones, la istorya i las kumidas kon el sujeto “Mozotros kon Muestras Istoryas” (Hikayelerle Biz).

El buto de este dia es de azer konoser los djudyos a los non-djudios i partajar kon eyos sus kulturas i sus istorias. Todas las aktividades organizadas sin paras, sin pagar nada. Tres ekspozisyones en diferentes salones… La primera, una ekspozisyon istorika de “Anne Frank”, la sigunda la de “Izzet Keribar”, un albüm de fotos ke konto una periyoda difisil en el pais, i la tresera la ekspozisyon de “Centropa / sentro Sefaradi de Estambol” ke es un proyekto de istorya oral (sözlü tarih projesi).

A las onze de la demanyana “Suzet Herman” kon “Şeli Gaon” avlaron sovre el pasado de la lingua djudeo-espanyola, sovre la etimolojiya de esta lingua presyoza.

El sujeto de la avla era: “El Djudeo-Espanyol tyene 500 Anyos ma Syempre Manseva” (Judeo-Espanyol 500 yaşında ama Hep Genç). Deke los djudyos desharon la Espanya i se propajaron a paizes diferentes de la Evropa? Deke no ambezaron a sus ijos i ijas el espanyol? Deke no los embiyaron a la eskola djudiya? I otros sujetos diversos. A la fin;

“Şeli Gaon” dyo unos kuantos egzempyos de las dichas i proverbos djudiyos, “Suzet Herman” konto unos kuantos kuentos (hikaye) verdaderos i izo riir a los partisipantes kon su sempatiya i su boz melodyoza.

El eskritor “Naim Güleryüz” eskrivyo un livro intitulado: “A traverso la Istorya los Lugares ande Moraron los Djudyos en Trakya i en la Anatolia”. El avlo sovre los evenementos negros i buenos ke bivyo la komunidad djudiya desde 1492 fina oy.

“Moris Levi” konto kuentos, proverbos i sus ideas sovre el djudaismo kon su perspektiva de vida. Su avla era intitulada “Esto Kontando una Istorya de Mi Para Mi” (Kendi Kendime Masal Anlatıyorum).

En el entorno de esta perspektiva avlo de estos sujetos:

La Famiya, la Emigrasyon, la Esperansa, el Mirakolo, la Resolusyon de Problemes, Mirar de diferentes puntos de vista a los evenementos, la Vida, la Diversidad (farklılık), la Mujer, el Trokamyento (değişim) de si para si, el Menospresyar (küçümsemek), ser atado a la Vida, el Amor... Todo en mostrando egzempyos i kuentos apropriados.

El punto el mas emportante de su avla fue, de la boka de “Moris Levi”: “Todos tyenen un karakter, un ego diferente. Vos oguro ke syempre tengash esperansa en la vida, syempre ke veygash lo bueno i no lo negro, syempre ke puedash amar al den frente, syempre ke tengash momentos alegres porke no kale olvidar ke la felisitad verdadera esta en el momento mizmo, syempre ke tengash una grande tolerensya, todos tenemos defektos (kusur) i lo mas emportante, ke seygash savios (bilge) i prudentes”.

Despues del komer de midi: “Yusuf Altıntaş” en su avla “El Estambol de al Tyempo” (Eski Istanbul) konto su chikes ke paso en Hasköy.

Los anyos de su chikes, de su manseves, las relasyones de los vizinos ke avlavan en turko, grego i ermenesko, sus tradisyones, los tratamyentos de los unos a los otros en las fyestas.

Mos konto esto todo kon una muzika vyeja de Estambol en el fondo ke estava muy sentimental.

Verso la fin “Cenk Rofe” kon “Ediz Bahar” mos dyeron un konserto de diferentes muzikales en todo modo de lingua. Unas bozes ekstraordinaryas ke todos estavan kon un grande entuzyasmo. El shef “Izzet Bana” kon las “Estreyikas d’Estambol” dyeron una savor diferente a la muzika. El koro i las kantikas de los chikos estava koza de ver.

“Sara Pardo” izo una prezantasyon manyifika sovre el kazamyento en Izmir kon todos las uzansas i los detalyos emportantes. Mos konto todos los kostumbres (adetler), todas las preparasyones ke deven de azersen antes i despues de la boda. Veramente diferente de las bodas de Estambol. Las personas ke reprezantaron la boda estavan komo deven de ser, muy elegantes kon sus vistimyentas. Despues de la boda se izo la fyesta de “Kezada”.

“Sara Pardo” trusho de Izmir un grande tefsin de masapan ke lo paso enriva de las kavesas de los muevos kazados. Kuando ampeso a azer pedasikos el masapan i echar enriva de las kavesas disho a la novya:

“Yo te parto esta Kezada para ke tures byen kazada; kon ijos, kon byenes i marido fina la vejes”. Esta seremoniya de kezada fue bastante enteresante.

“Sara Pardo” termino su avla kon estas palavras: “Esto rogando al Todo Poderozo para ke muestras tradisyones no se terminen nunka, i ke muestras manos yenas de amor seygan bendichas komo el amor de muestro korason”.

El diya se termino kon el spektaklo de “Shemesh Karmiel”, kon 2000 personas ke partisiparon a las aktivitades.

Kero felisitar el groupo de dammas ke organizaron este diya maraviyozo i spesyalamente felisitasyones a “Emel Benbasat” ke se kito la alma, koryendo de un lugar al otro para ver si todo estava en regla. Penso ke ya se reusho al buto ke se kijo.

Mijorado del anyo vinidero!

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın