La fin de la semana pasada, desidimos kon una amiga de vijitar unas kuantas ekspozisyones de fotos ke se ivan a terminar a la fin del mez de septiembre.
La primera fue la de “Ara GÜLER” en Bomonti.
“Ara Güler” es un fotografo famozo, konosido en el mundo entero. Mientres ke estudyava en el liseo, el lavoro en kada rama del sinema (sinemacılığın her dalında). En mizmo tyempo kontinuo a los kursos de teatro porke keriya ser un direktor.
En el anyo 1953, se publiko en la Inglaterra la “Antolojiya de Fotografia Anual” i kon esto fue rekonosido komo uno de los 7 mijores fotografos del mundo.
El fotografyo a syenes de personalidades famozas komo, “Nazım Hikmet”, “Winston Churchill”, “Salvador Dali”, “Picasso”, “Ghandi”, “Dustin Hoffman”, “Maria Callas”, “Sophia Loren”, “Orson Welles”, “Charlie Chaplin” i munchos otros. A todas las fotografiyas ke fotografyo, el reusho a azer una istorya. Era un personaje muy valutozo; se puede mizmo dizir ke era un mito (efsane).
El muzeo de “Ara Güler” en “Bomontiada” avyo sus puertas kon la ekspozisyon “el Chuflete del Ombre”.
“Ara Güler” era un eskrivano produktivo, kontava i transferava (aktarmak) las konsejas i los kuentos.
En esta ekspozisyon muy reushida puedemos ver todas las fotografiyas, las konsejas, los videos del arshivo del artisto.
Malorozamente mos desho la buena vida en agosto, 2018 a los 90 anyos. Ke su alma repoze en Gan-Eden.
La sigunda ekspozisyon tuvo lugar en “la Eskola Grega de Galata” de “Ani Çelik Arevyan”. Esta ekspozisyon mos ambezo la diferensya ke ay entre “Mirar” (bakmak) i “Ver” (görmek). “Ani Çelik Arevyan” ampesando del anyo 1987 fina oy, kontinuo a segir las trasas (iz) del tyempo en el lavoro de las fotografiyas ke izo.
Eya tyene un arshivo de 95.000 fotografiyas ke travo en los viyajes ke izo en todos los lugares del mundo. El nombre de la ekspozisyon es “Djusto Komo Es” (Olduğu Gibi).
En esta seria, eya fotografyo las shenas de la vida. Eya kreyo imajes duales (ikili imajlar).
Este arshivo le esta azyendo akodrar las diferentes pajinas de un livro. Pasando las pajinas del livro esta imajinando una istorya kurta. Estas kurtas istorias estan indo i vinyendo entre la armoniya (uyum) i la inadaptasyon (uyumsuzluk) entre el tyempo ke esta koryendo.
Veramente fotografiyas muy enteresantes i muy byen ordenadas en esta ekspozisyon.
La ekspozisyon d’alkavo fue la de “Ali Kabaş” en la galeriya “Işık Sanat Galerisi” en Nişantaş. “Ali Kabaş” vijito munchos lugares egzotikos en el mundo entero. El travo kon su paramotor en el syelo fotografiyas extraordinaryas de la natura multikolor. La persona se esta sintyendo komo un pasharo entre las kolores briyantes yenas de luz en mirando a sus fotografiyas.
Sus fotografiyas se topan entre el syelo i la tyerra. Viajamos kon sus fotos entre los lugares naturales i diferentes lugares de la tyerra ande ay diferentes zonas de la vida. Bolando kon su paramotor en el doredor de la mar preta, Karadeniz, de la mar Marmara i Ege el topo en muestro pais ke es un paradiso munchas ermozuras naturales i las fotografyo kon una grande kapachitad.
Veramente keridos lektores, fue un dia reushido i yeno de kultura.
