Compass doganbaruh

Rosh - Ashana

Rosh - Ashana

Kada anyada mueva es la puerta de un presipyo (başlangıç); de un empesijo. Para las personas el anyo muevo es la sinyifikasyon de las muevas emosyones, muevos dezeos, muevos akontesimyentos.

Dingunos de mozotros somos perfektos. Todos penamos kontinualmente para ser una persona mas buena. Unos de mozotros keren aflakarsen, otros no keren mas fumar, u el buto de otros es avansar moneda. Ken de mozotros keren ser mas pasensyozos, otros mas ordenados (düzenli), otros tolerentes...

Bueno, para empesar a trokar deke eskojemos los primeros dias de la anyada mueva, i non los dias ultimos de la anyada pasada?

Las personas tyenen una abitud de tomar muevas desizyones en entrando a una anyada mueva i kale desidar de kontinuar en esta atitud (davranış) buena durante el anyo. Por egzempyo, para resolver todo en un punto, se prefera empesar kon pasos chikos. Kale ser realistos. Puedemos tomar una desizyon por egzempyo de azer mas munchos egzersizyos, para pueder aflakar i konservar la sanedad. Para koryer un kilometro u kaminar kada demanyana ke es difisil en invyerno kon las luvyas kale azer en kaza vente puntos de movimyentos, o demanyana o la noche. No por sedaka (sakın ha), no vos arrepintesh.  

Este anyo pensaremos i mos kreeremos veramente de aryento muestros korasones ke va ver pas en el mundo, ke la umanidad no va pensar mas a lo negro i va penar para ke el mundo se aga mas ermozo de dia en dia. Para empesar, bushkaremos imediatamente un amigo ke pensa ke mos olvidimos de el.

Purifikaremos muestros meoyos, de las entisyones negras i del selo.

Estaremos mas delikados kon muestro entorno i mas finos.

Azeremos komplimentos a las personas para ke seygan orozos.

Mos olvidaremos las indjustisyas ke mos izyeron.

Sintiremos mas muncho i estaremos atentivos.

Kuando fuimos indjustos, no mos absteneremos (çekinmek) de ekskuzarmos.

Daremos emportansa a las ideas diferentes ke no son las muestras.

Kuando mos atristamos (üzülmek) o mos inyervamos, mos demandaremos de si para si: Este problema va ser tan emportante despues de dos semanas?

Kuando tenemos menester de koraje, mos sugjeraremos (telkin etmek) de si para si.

No mos olvidaremos de sonreir (gülümsemek) mas muncho. Teneremos mas muncha tolerensya. No es fasil de azer esto todo, ma kale empesar kon kreensya (inanç).

I lo ke es provechoso de lo ke akomplimos este anyo, formara (teşkil etmek) una eskalera para el anyo venidero. No kale arrepentir (vazgeçmek) de las desizyones ke tomimos.

Una anyada mueva, es un avenir muevo. I la vida va pasar ansi, kon muevos dezeos, ilusyones (düş), emosyones i ideas....  Agora ke ya pasimos muevamente la semana de Rosh-Ashana  ke es una de las fyestas  las  mas emportantes i el dia de arrogar al Dyo, en sintyendo el Shofar para orasyonar por el anyo muevo; por la sanedad, la felisitad i por pas i amor en el mundo entero.

Los djudyos toman muevas desizyones; se esforsan a purifikarsen de sus manyasi i tyenen la kreensya ke van a estar perdonados de sus pekados de la parte del Todo Poderozo. Todos los aravyados kale ke se agan pas, ke se rekonsilyen antes de Rosh-Ashana para entrar sin pekados al anyo muevo. Todas las promesas (vaat) son ovligadas de realizarsen para ser una persona mas umilde (alçakgönüllü) i para ser mas fruktuozos a la umanidad. Estaremos todos eskritos en los livros santos...

Eskritas buenas i el Dyo ke mos guadre de las kozas ke no mos puedemos guadrar...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın