Keridos Korelijionarios,
En estos dias ke estamos a la entrada de un anyo nuevo, me gustaria de empesar a este mesaje en aderesandovos la bendision apropriada a estos dias:
“Empese la anyada kon sus bendisiones”
Komo ya lo savemos muy bueno, Rosh Ashana es una oportunidad de kontrolar nuestra kondukta en realizando un egzamen de konsensia.
El mez de Tishri es un periodo yeno de espritualizmo i orasion ke nos da la okazion de akordar nuestro kondukto a los preseptos de nuestra Santa Tora, kon “Rosh Ashana”, “Yom Kipur” i las fiestas de “Sukot”, “Shemini Atseret” i ”Simhat Tora”.
“Ayom Arat Olam, Ayom Yaamid Bamishpat”
“Es diya ke se manifesto el universo, Es diya de estar en djuzgo”
Klaro ke ya estamos bien prontos a esta atmosfera dizde un mez kon las orasiones de “Selihot” i vos kero akodrar ke esto es la oportunidad para mereser la klemensia i la induljensia de El Todo Poderozo. Lo ke resitamos en Selihot:
“Arhek Midarhe Bene Adam Veshur Darhe Gevoeha”
“ Aleshate de kaminos materiales i toma kondukta de los sielos”
es una yamada a todos nozotros.
Keridos Ermanos,
Komo siempre kero traer a vuestro kudyado el fakto de nuestros ijos i ijas a ken devemos transmeter nuestra kultura i nuestra fe sin ningun empedimyento por buto de asegurar el futuro de nuestra egzistensia.
En esta rama, todos semos responsavles i lo mas nuestras dammas i ermanas ke se preokupan kaji kon todo modo de evenimyento komunal kon abnegasion donde las agradesko de todo mi korason.
Keridos Ermanos
Siendo ke semos una komunidad ke de dia en dia se esta amenguando, tiene muncha emportansa el diridjirse muy munisiosamente. Tengo el dover de apoyar kon mis bendisiones a el Prezidente de nuestra komunidad djuntos a nuestros konsejeros ke verdadmente se estan esforsando kon abnegasion en este asunto i dezeo ke todos nuestros ermanos se adjunten kon eyos moralmente i materialmente.
Todo en aviendo entre nuestros korelijionarios:
“Ahava Veahva, Shalom Vereut / Amor i ermandad, pas i Amistad”
No deve de aver ningun dubyo ke puedemos defender i enforteser nuestra egzistensia.
El empesijo de un nuevo anyo es tambien la okazion de adresar nuestras orasiones a el Santo i Bendicho El ke nos regale un mundo yeno de pas i prosperidad.
Siendo yeno de estos pensamientos i sentimientos, sueto ke seamos meresientes de la mizerikordia del bendicho Kriador i ke alkansaremos a munchos anyos kon todos nuestros keridos i serkanos kon sanedad, prosperidad i alegria.
Kon todas las bendisiones da la Santa Tora.
Tizku Leshanim Rabot
Shana Tova Umeusheret.
Rav İsak HALEVA
Gran Rabino
