Anet Pase
Nomofobi es una palavra ke me renkontri en la gazeta Dünya de Lunes 13 Agosto (YAKIN PLAN, Didem Eryar Ünlü – Cep telefonum olmadan asla…). Despues en la televizyon vide munchos reportajes ke se realizaron en las kayes sovre esto sujeto. Ize un poko de investigasyon i topi el platform de Tuğba Şengül, ke se yama digital detoks.
Nomofobi sinyifika: espanto de kedar sin telefon.
Fobo sinyifika: espanto de kedar aparte de la media sosial.
Ibertronik sinyifika: para topar remedyos a las hazinuras, emprimero ir al doktor Google, al lugar de ir al doktor de verdad.
Tuğba Şengül tiene videos en el kanal “Digidetoks” sovre digital detoks en el YouTube (https://www.youtube.com/channel/UCffHigHSmIu7jty_k_mL4zw) i mos konta los danyos de azermos dependyentes (bağımlı) al internet. Eya se eskojo una misyon sovre el mundo dijital ke todos parvienen de utilizar kon ekilibro. En los videos esta amostrando personas aedadas o mansevas, djentes de kualker profesion ke seya. Estan kontando ke no pueden deshar de la mano, ni un punto, el telefono intelijente.
La jenerasyon muestra, desmazalada, kedo en dos puntas. Kuando nasyo mi ijo, pagimos un monton de moneda al PTT para ke kuando se va azer grande ke tenga telefon. Andjak les estava vinyendo la sira de tomar numero de telefon. Kuando se izo de dyez anyos, ya se eskapo el dert del telefon i empeso avagar avagar los telefones mobiles. Unos pedasos grandes. En Turko diziyamos Takos. I ken esta en el debarkader avlando i amostrando el telefono mobil lo averguansavamos. Les diziyamos “nalo, ya esta pasando el riko muevo”. Agora no kedo ni esto. Ya se enchikesyeron, entraron a la aldikera. Ya se izyeron delgados i finos. Agora mi inyeto de sinko anyos tiene el telefon en el braso komo una ora. La madre i el padre kada punto ya estan enkoryente ande esta el ijo. I mas de mas ya esta puedyendo pizar a los shifros para bushkar al nono o nona o a la tiya. I el mas chiko, ke tiene apenas dos anyos kon los dedikos chikos chikos ya esta arondjando las aparisyones i esta eskojendo lo ke kere. Esto todo mos esta azyendo dependyentes de los siete fin a los setenta. Las personas estan kaminando kon los telefones mobiles en las manos. Afilu en tomando un kafiko kon las amigas. Los puerpos estan en el cafe, ma los ojos i las orejas en los telefones.
Tuğba Şengül en su platform de digital detoks mos rekomenda de azer un detoks komo ke azemos detoks de diyeta. Komo es detoks de diyeta? Todos ya saven. Uno o dos diyas no komes nada de lo ke uzas de komer kada diya. Te mantyenes solo kon aguas de zarzavat i aguas de frutas. Serra, no un diya entero a lo manko unas dos oras la komünikasyon kon el Internet. Melda un livro. Aze un dezayuno, avlando i burlando kon tu famiya sin mirar a la djente. Ya saven todos las kostumbres buenas ke mos esta trayendo el mundo dijital, ma todo kon karar. Ay personas ke no estan dando paso sin telefon. Si les eskapa el sharsh, ya estan aryento de una kriza. Si estan asentados en un lugar, antes del menü ya estan demandando el shifro del wifi. Si estan en un konserto, al lugar de mirar a la shena, estan mirando al objektivo de kamera. Salvarmos i ganarmos demuevo la salud es ke esta en muestras manos. Dependensya es una hazinura. Keridos lektores, vos esto envitando a todos al Digital Detoks.
