Ree

Rav Yeuda ADONİ Köşe Yazısı
8 Ağustos 2018 Çarşamba

La perasha Ree empesa kon el verseto “Ree anohi noten lifnehem ayora Beraha…” Yo vos esto dando a vosotros le bendisyon i la kontra: Si vash a sintir mis fueros i mis enkomendansas todas las bendisyones ke estan endikados en la Tora, las vash a alkansar. Shelomo Ameleh en su livro Mishle dize: No es Bueno la persona ke sea haragan, i nos trae por prova a la ormiga ke es muy aguda. De enverano apareja su mantenimyento i el mantenimyento de sus chikitos. El haragan si ve en su kaza ke ay de atakanar alguna koza i lo desha de atakanarlo kavza munchos danyos a si i a su famiya. En tyempo ke esta todo barato no empleya lo ke tyene de menester. Se ovliga a merkarlo a el avenir mas karo. Lo mismo es en aplikar los komandos de la ley i las mitsvot. Kuando estamos enfrente de una mitsva por afirmarlo devista devemos afirmarla i no desharla mas tadre. En Pirke Avot, meldamos, “No digas, kuando tengo tyempo lo ago de syerto, puedeser no vas a tener tyempo”. Al tomar linshapane eshne sheme la tipane. Moshe Rabenu en la perasha Ree nos esta enkomendando de eskojer el kamino derecho ke nos amostra a nosotros el Kriyador. El kamino de la bendisyon ke nos da vidas de bivir. Dunke devemos venser a nuestro apetite el malo yester ara i kaminar kon el doktrino de el yetser atov, el apetite bueno. Kada demanyana en las berahot ke dizimos antes de tefilla dizimos: vaterhikenu miyetser ara vetadbikenu beyetser atov: aleshamos de el apetite el malo i apegamos kon el apetite el bueno. Estonses no azemos personas tov leshamayim ve tov lebariyor: Buenos kon el Kriyador i Buenos kon la djente. Buenos kon el Kriyador es, de ser personas derechas, djustas i onestas por razon ke semos keridos verso el Kriyador. Banim atem L’ashem. Semos kriados verso el Kriyador.

Vinyendo verso la djente, devemos de ser djustos, no deshar sufriir a ningunos. Devemos de avrir nuestras manos a los menesterozos. De la bendisyon ke nos da el Kriyador, devemos azer aprovechar i al ke no tyene. Tambien en la perasha meldamos las tres fyestas kuando se vijitava el santuvaryo. Pesah, Shavuot i Sukot. De alegrarmos kon nuestra famiya nozotros i no olvidarmos de los menesterozos.