En 14 Augusto 1889, (egzaktamente en el 17 Av 5649, data djudia) 800 djudios ayegaron a Buenos Aires, markando el nasimiyento de la komunidad djudia moderna en Argentina. Estos imigrantes estavan fuyendo de la provedad i los pogromes en Rusia i eskojeron komo pais la Argentina porke teniya una politika de imigrasyon avyerta a todos. En 1920, mas de 150,000 djudios estavan bivyendo en Argentina. El arrivo de Juan Peron al poder en 1946 fue un sinyo de negra ogura, porke el era un simpatizano nazi kon inklinasyones fashistas. Peron areto la imigrasyon djudia a Argentina, entroduzyo la edukasyon relijyosa katolika ovligatorya en las eskolas publikas i permityo ke la Argentina seya un refujyo para los nazis ke fuiyan. (En 1960, los ajanes israelis apanyaron a Adolf Eichmann en un banliyo de Buenos Aires, i todos savemos la istorya). Oy, Argentina tiene la mas grande komunidad djudia de la Amerika Latina kon kaji 250,000 almas, aunke los atakes teroristas kontra los djudios avriyeron el kamino de la emigrasyon a munchos mansevos. En 1992, la Ambasada de Israel en Buenos Aires fue bombardeada, matando a 32 personas. En 1994, el sentro de la komunidad djudia en Buenos Aires fue bombardeada, matando a 85 personas. Los perpetradores nunka fueron apanyados.
