La sinyifikasyon de la fiesta Tu B´av

Dora NİYEGO Judeo-Espanyol
1 Ağustos 2018 Çarşamba

Tu B’Av sinyifika el 15 del mez de Agosto en ebreo. Munchos eventos felizes (mutlu) i milagros (mucize) afitaron en esta data. El mesaje ke Tu B’Av mos da es ke mezmo en los mas negros eventos, no kale dezesperarse. El Dio, Todo Poderoso siempre mos konfia ke mezmo en los momentos los mas negros no kale pedrer la esperansa, i ke siempre una mueva puerta se avre.  En la estoria, los eventos ke muestros padres bivieron en el 15 de Av - Tu B’Av son la reparasion de la kayída de Tisha B’Av.

Tu B’Av este anyo se selebro el jueves, 26 de julio i el viernes, 27 de julio.

Mezmo ke Tu B’Av es un diya de fiesta komo esta eskrito en el Talmud, esta fiesta empeso a selebrarse en los anyos dalkavo en Israel. Tu B’Av se selebra kon bayles, rozas koloradas, i kantikas de amor en la radio.

Las paredes de Yerushalayim fueron, un tiempo, la fuente de enspirasion del amor. Miles de anyos antes, kuando dainda el mundo no saviya el diya de San Valentino, los judios aviyan kreado un festival de amor en el sentro de Yerushalayim.

Debasho del lunar en kinze, en los diyas de enverano, las mansevas vistidas en blanko, baylavan en los kampos, afuera de las paredes de Yerushalayim. Los mansevos se ivan a los kampos kon la esperansa de topar una novya. Tu B’Av se selebra una semana despues de Tisha B’Av, ke es el mas triste diya de los judios.

Tu B’Av se selebra afuera de las paredes de Yerushalayim, leshos del Monte de Templo, el lugar de la destruksion.

Tisha B’Av es el diya kuando el Dio deklaro ke los judios van a pasar kuarenta anyos en el dizierto. Tu B’Av es el diya, kuando kuarenta anyos duspues, los 15.000 israelianos ke kedaron de la jenerasion del dizierto, entraron a la Tierra Prometida. En este diya, el Dio pardono al puevlo judio por el pekado ke aviyan echo: aviyan konstruido un bekerro (buzağı) de oro, i despues empesaron a adorarlo. En el Talmud eskrive ke ‘Nunka no uvo en Israel, mijores diyas del kinze de Av, i del Dia de Atonamiento’ (Kefaret Günü).

En Tu B’Av, las ijas de Yerushalayim baylavan en las vinyas, kantando ‘Mansevos, alevanta los ojos, i mira kuala manseva vash a eskojer. No fiksesh los ojos solo en la ermozura, ma mira ke la ija ke vash a eskojer seyga de buena famiya. La ermozura vos puede trompar, ma la mujer ke tiene espanto del Dio, es la mas alavada’.

Deke el anyo judio se eskapa kon una selebrasion de amor? Una repuesta a esta kestion es ke ‘el judaizmo, en las relasiones da muncha emportansa al amor’.

En Tu B’Av, todas las mansevas i los mansevos se visten vistidos blankos porke blanko es la kolor de la semplisidad. Esto kere dizir ke las valores materiales no deven enfluensar los mansevos kuando van a eskojer una partenera. Los mansevos deven de mirar debasho de las valores superfisiales, antes de kazarsen.

Tu B’Av es un grande dia para bodas, seremonias, azer propozisiones de kazamientos. Es el diya de amor ke se selebra kon kantes, bayles, rozas, i meldando la Torah. En esta fiesta se pasa mas muncho tiempo meldando la Torah, porke despues de Tu B’Av, los diyas santos empesan a aserkarsen.