Komunikasyon de un kerido lektor

Silvyo OVADYA Köşe Yazısı
18 Temmuz 2018 Çarşamba

Ay mezes para no dizir anyos ke esto resivyendo mailes del Profesor Haim Vidal Sephiha ke tuve la onor de konoser en Israel en 1989 durante el primer Kongreso sovre los Djudios Turkanos, organizado por la asosiasion Morit enkavesada por el Dr. Gad Nasi (z”l). I durante esta semana reelmente tuve un grande plazer de konoser un alay de djente ke esto dainda en kontakto.

Esta fin de semana kuando meldi el mail del Prof. Sephiha me plazyo muncho lo ke me eskrivyo i le di una repuesta i me respondyo una segunda vez. I eskrivi siertos biervos en el grupo del Sentro Sefardi de Estanbol. I mis amigas/amigos fueron empesyonados de estos mesajes i di karar de publikar estos tres mesajes:

El primer mesaje del Profesor Sephiha:

Akavo de meldar kon el plazer siempre la pajina “Judeo-Espanyol” del 27 Haziran

Bravisimo! En una sola oja tanta rikeza! Me tresali i te rogo ke felisites de mi parte todas i todos ke van asta aklarar en turko los biervos deskonosidos de munchos meldadores lo ke aziya Leyon (z”l). Grasias mil...

Haim Vidal Sephiha

 

I le respondi sin pedrer tyempo:

Karo Haim

Esto resivyendo tus mailes. Esto tanto kargado kon los echos ke esto azyendo, ke no topi el tyempo para eskrivirte un mail. Reelmente m’esto averguensando de esto.

Esto muy kontente de saver ke estas meldando la oja de judeo-espanyol del Şalom. Despues de la disparisyon de Klara Perahya (z”l), esto es reelmente un dover para mozotros de kontinuar la publikasyon del Şalom en djudezmo i del Amaneser. Tenemos syertos mansevos (35-40 anyos) ke mos estan ayudando i mos estan dando muevas ideas. Estamos empleando los medios elektronikos para pueder ambezar siertos biervos i un poko de muestra lingua. Karen esta lavorando de diya i de noche.

Tenemos un koro formado de 20 dammas ke va dar un resital en un klob en la Ada ke no es un lugar ande solo los djudios frekuentan. Haim, esto muy kontente de meldar lo ke eskrives i esto demandando al Dyo de ser komo ti a tu aedad si el Dyo me da vida.

Entre las aktividades ke esto realizando, esto organizando serka kada mez una ekspozisyon i 2-3 konsertos (internasyonales) al anyo en la sinagoga de Edirne (Andrinople) ke fue restorada i ke es una de las mas grandes sinagogas de la Evropa kon la de Budapeste i la de Sofia.

Esto lavorando sovre una ekspozisyon i un livro sovre los Djudios - Sefardim de majorita - kon las kartpostales i sus eksplikasyones ke van komportar la Turkiya de oy i Salonika.

Haim, va eskrivir al grupo lo ke me eskrivites.

Saludes,

Silvyo Ovadya

 

Haim se alegro muncho de mi repuesta i me respondyo:

Grasias mil! Karo Silvyo,

Tu mail me achileo el korason! Me alegro muncho.

Todos djuntos formash un grupo rezio i yeno de kombatividad para reskatar i salvar lo muestro.

Sanos i rezios ke estesh todos. 

Kon mi karinyo de siempre.

Haim-Vidal