Avlar i avlar

Judeo-Espanyol
18 Temmuz 2018 Çarşamba

Todos avlamos i avlamos sin kedar. En vezes avlamos kozas ke no keremos dizir i en vezes avlamos kozas ke keremos dizir en saviendo ke va azerle pena al de enfrente.

Ay maneras i maneras de dizir la mizma koza.  No me olvido la konsejika ke aviya meldado un tiempo antes. Ke ermozas lisyones  ke mos dan las konsejikas. Aki vos esto kontandola.

En un payis muy muy leshos del oriente biviya un Sultan muy poderozo. Teniya una grande rikeza.  Todos se espantavan de el por ke no teniya piyadad. Era i muy superstisyozo. No echava paso sin demandar a sus savios.

Un diya se esperto el Sultan aryentro de la sudor, porke se aviya sonyado un esfuenyo muy estranyo. En su esfuenyo vido ke todos sus dientes se estavan kayendo unos a unos. Pishin ke se esperto, izo yamar a los savios del payis para ke enterpreten su esfuenyo.

Vino uno de los savios delantre del Sultan. El Sultan le konto su esfuenyo i aspero la repuesta del savio. El savio, despues de pensar un poko i despues de konsultar sus livros, le respondyo:

Mi Sultan todo poderozo, este esfuenyo malorozamente es un esfuenyo muy negro. Kere dizir ke vas a peryer todos tus keridos paryentes, en serka, unos a unos.

El Sultan ke oyo esto, se inyervo enormamente. Le disho: Bre no te averguensas de dizirme una koza semejante, komo te atrives  a azerme pena en dizyendome esto?

Yamo a sus guardias i les ordono: Tomaldo a este sinverguensa i dalde 100 palos a sus piezes!!! Lo tomaron al povereto savio i se lo yevaron al kastigo.

El Sultan dio orden ke le traygan un otro savio. El savio muevo ke era muy entelijente, ya aviya oyido esto todo lo ke se paso. Kuando el rey le konto su esfuenyo, le respondyo: Ah mi Sultan todo poderozo, este esfuenyo es un muy buen esfuenyo. Mos dize ke su Majestad va bivir munchos mas anyos de todos sus keridos paryentes.

Tanto le plazyo al Sultan la enterpretasyon de este esfuenyo, ke ordeno a sus guardias ke le den 100 liras de oro al savio ke le disho las kozas ke le plazyo.

En saliendo de el palasyo se renkontraron los dos savios. El ke komio los palos a sus piezes, le disho. Komo puede ser kerido amigo, todos los dos dishimos la mizma koza, ma yo komi los palos tu tomates los oros.

El amigo le respondyo: Kerido amigo, las palavras son komo piedras presiozas. Si tomas un diamante i se lo echas a la kara de alguno, lo puedes firrir. Ma si lo metemos en un ambalaje de seda, i lo ofresemos kon grasia, va ser akseptado kon agrado. No te olvides kerido amigo, kontinuo el savio. Puedes dizir la mizma koza en dos formas diferentes. La pesimista ke mete en valor solo el senso negativo de la verdad o la optimista ke mete en valor el lado positivo de la mizma verdad.

Ya tenemos proverbos ke tienen la mizma tema i no peryen nunka sus aktualidades. Por egzempio: La alguenga aze i la alguenga dezaze. Kon palavras dulses puedemos kalmar i konvenser muestro enemigo, i deke no, azermos buenos amigos. Este metod se puede empleyar en la diplomasiya, en los tratos del komersio, en las reklamas, i los avokatos los pueden empleyar en los tribunales. No vemos ke los kulpavles toman mankas punisyones, grasias a la intelijensya i grasias a el buen avlar de sus avokatos?

Siempre avlaremos kon dulsor, no azeremos pena a dingunos, desharemos una sonriza dulse detras de mozotros…