Un estudyo sovre las kreaturas de las madres ke lavoran

Dora NİYEGO Judeo-Espanyol
18 Temmuz 2018 Çarşamba

Un estudio en la Harvard Business School sovre las kreaturas de las madres ke lavoran esta amostrando ke las madres ke lavoran tienen ijas mas reushidas i ijos mas kerensyozos.

Las ijas de las madres ke lavoran keren ganar paras mas presto ke las ijas de las mujeres ke no lavoran. Los ijos de las madres ke lavoran son mas atados a la famiya, i les plaze pasar mas muncho tiempo kon sus famiyas.

Kathleen McGinn, profesora de la Harvard Business School i autora prinsipal del estudio, esta diziendo ke las ijas de las madres ke lavoran estan preferando ser supervizoras (gözetmen) en sus lavoros. “Esperavamos ke eyas ivan a kerer lavorar komo sus madres, ma no esperavamos ke ivan a kerer tambien tomar responsabilidad en aziendosen supervizoras” esta diziendo McGinn. “A lo ke vimos es ke las madres estan kreando una ambiansia ke esta efektando los komportamientos de sus kreaturas”.

Segun una mueva investigasion de la Universidad de Oxford, las kreaturas de las madres ke lavoran tienen kapasidades superiores enriva de kapasidades sosyales, konversasion i komportamiento.

Un otro deskuvrimiento de este estudio esta amostrando ke las kreaturas ke se van al kindergarden (yuva) tienen kapasidades sosyales superiores  ke las kreaturas ke pasan mas munchas oras kon nonas, kuando las madres se van al lavoro.

Tener una madre ke no lavora i ke se okupa mas munchas oras kon sus kreaturas, tiene un efekto negativo en estas kuatro kapasidades: sosiales, konversasion, komportamiento i kotidianas. Por kontrario,  tener una madre ke lavora ma ke tiene mas munchos anyos de edukasion tiene un efekto positivo enriva de estas kuatro kapasidades.