La GRANDE SINAGOGA de GAZIANTEP

Dora NİYEGO Judeo-Espanyol
4 Temmuz 2018 Çarşamba

Estava pensando sovre lo ke puedriya eskrivir en mi kolona esta semana. Reelmente estava indesiza, pensando. A un momento me kedi mirando a la kacha de la Halila 5778, komo si fuera por la primera vez ke la estava vyendo. En realidad, era primera vez ke me travaron la atansyon las letras eskritas en la  derecha (abasho):  Meldi: La Sinagoga de Gaziantep.

Al momento me akodri del lavoro del Sr Joel A. Zack: The Historic Synagogues of Turkey ke tengo en mi biblioteka. Topi dos ojas ekskluzivas apartadas para la Grande Sinagoga de Gaziantep, amostrando dos fotografiyas del eksteryor.

La una de la facha i la guerta, (o kortijo) la sigunda tambien una vista diferente de la mezma guerta, i un pozo. La data de la konstruksyon de la Grande Sinagoga de Gaziantep no se save. Tomando en konsiderasyon la grandor de la  Sinagoga i, tambien su rikeza, se puede dizir ke,  una grande Komunidad Djudia bivyo en esta chika sivdad del Sud-Oeste de la Turkia, no muy leshos de la sivdad ande, (asigun la leyenda)  nasyo Avraam Avinu.

Los djudios abandonaron finalmente Gaziantep en el anyo 1970.