Ay dos mezes ke pasamos el tyempo en mirando las televizyones ke azen programes politikos sovre las eleksyones. Kreo ke es por la primera vez ke las anketas sovre los rezultados de las eleksyones se yerraron de mala manera. Es siguro ke estas anketas no son muy sanas i kada uno da el rezultado komo lo kere. I azen manipulasyones para orientar la djente. No es muy kolay de topar mizmo en este kampo personas onestos ke van a reflektar (yansıtmak) la verdad. En las televizyones el kandidato de la opozision estava kada noche en las televizyones. En diferentes sivdades tuvo la posibilidad de azer mas de syen i diez manifestasyones kon una grande djentorya (kalabalık). Dia de Shabat avia en Estanbol una manifestasyon del partido de la opozisyon ande se dize ke mas de sinko milyones de personas asistyeron. I una grande partida de la djentorya vinyeron kon motores porke era un kuartier en la partida asiatika al bodre de la mar: Maltepe. I dia de Alhad, serka de noventa por syen de los sivdadinos, de la 8 de la demanyana fin a las 5 de la tadre se fueron a votar por el Prezidente del pais i para los 600 deputados. I el Akparti reusho una otra vez para resivir serka de la majoridad en el parlamento.
Kreo ke el kandidato de la opozisyon, Muharrem Ince, no resivio ni los votos de los ke partisiparon a la manifestasyon de Shabat. I vimos ke es muy difisil de trokar la opinion de los sivdadinos mizmo si la ekonomiya no esta muy famoza, i mizmo en syertos sujetos, los sivdadinos biven en difikultades. Ma dospues de estos rezultados, kreo ke vamos a ver una variasyon (değişim) en los lideres del partido de la opozisyon. Porke Ince reusho a obtener mas de 30% de los votos ma su partido solo el 22%.
Espero ke en estos 5 anyos vamos a topar el repozo i la prosperidad. Es vedra ke muestro pais tyene syertas difikultades ekonomikas, ma kreo ke el muevo governo va lavorar para pueder ameliorar (daha iyiye götürme) la situasyon.
Ma kreo ke la djustisia i los problemas de edukasyon van a ser los dos sujetos los mas emportantes de muestro pais.
