Lunes ultimo fui envitada a una nochada ke organizaron los dirijentes del ospital Amerikano, por el muy presyozo Prof. Dr. Mois Bahar ke kijo ser retretado a la fin del anyo 2017.
Mois Bahar kontinuo su vida akademika fina el anyo 2011 syendo eksperto sovre la “Reanimasyon i la Anesteziyolojia” i paso esta periyoda en “La Fakultad Medikal de Cerrahpaşa” durante 47 anyos. Mas de vente anyos fue el direktor del “Servisyo Intensivo” (yoğun bakım) en el ospital Amerikano.
Para remersyarlo i onorarlo le organizaron una nochada fina i elegante, inolvidavle en el otel Divan yena de sentimyentos kayentes.
La fason de resivir en la puerta, el servisyo de los garsones en el kokteyl, la fineza de yamarmos a las mezas ornadas kon flores blankas i amariyas de kolores pasteles.
Todo estava komo se deve, dinyo del doktor.
El Prof. Dr. Mois Bahar es una persona ke da una enerjiya pozitiva al den frente, kalmo, kon kara riyendo, alivyana los problemes en dando esperansa kon su boz dulse i da konfiensya. La valor umana i el lavoro kon su ekipa endjuntos son los prensipyos emportantes para el.
Es un “LIDER” ke tyene una disiplina del lavoro i partaja todas las enformasyones de la unidad intensiva kon su ekipa en dandoles las responsabilidades menesterozas para ke se ambezen.
Se aserka de los hazinos kon empati en avlando i dando los detalyos de la hazinura kon una lingua yena de kerensya i respekto.
“Mois” tyene un korason de oro, personaje djusto ke aze su lavoro sakro kon senseridad, i kon atitud respektuoza. Edukado, umano (insancıl), un siyantifiko (bilim adamı), buen marido, buen padre i granpapa, uno ke no se topa fasilmente en la vida. Un aliado (dost) ke korre a los ke estan en difikultad.
Despues del primer plato sirvido kon las bevyendas, un doktor tomo la palavra para avlar sovre el Prof. Dr. M.Bahar.
“Rahmi Koç” kon “Inan Kıraç” le dyeron una plaket en remersyandolo por todo lo ke izo en el servisyo intensivo.
“Semahat Arsel”, nomada la idola de las enfirmyeras, mizmo ke estava hazina asistyo para mostrar su apoyo a su amigo entimo.
A la fin, “Mois Bahar” tomo el mikrofon i disho: “Esto orgulyozo de la organizasyon de esta nochada.
Tengo sentimyentos diferentes. Lavori en el ospital en una ambiyensya agradavle, durante 25 anyos. Agora kije trokar mi vida i kije echar un paso verso el avenir. Ampesi en 1994 a lavorar aki i la administrasyon (yönetim) me dyo muncho apoyo. Kero remersyar Rahmi Koç kon la administrasyon del ospital Amerikano por el grande apoyo ke me dyeron para enstalar el muevo departamento del servisyo intensivo, ke lavori noche i dia para ke no manke nada i ke seyga un servisyo perfekto. Kreygo ke ya reushi a mi buto (amaç).
Kero remersyar mi ermano grande por el apoyo ke me dyo para mis estudyos, para ser un mediko. Esto orgulyozo de tener este modo de mujer “Emel”, kapache, devuada i kerensyoza ke me suporto 35 anyos i me dyo el apoyo el mas grande en la vida.
Mersi tambyen a mi ija ke vino de Valensya kon su marido i su ijo, i a mi ijo ke vino de Paris para estar al lado de mi.
Terminando mi avla keridos envitados, vos remersyo de vuestra assistensya i de vuestra kerensya”…
Kerido “Mois” kero terminar mi eskrita kon la poezia ke eskrivyo mi kerido “Meir” (z.l.) ke te keriya muncho byen antes de su hazinura maldicha.
AL PROF. DR. MOIS BAHAR
Un luchador de vida
Amasado kon el amor umano
Una sita de respirasyon
El buto suyo es dar la vida….
Se aserka a las personas kon una sonrisa
Kon la palpitasyon de la sonrisa ke vyene del korason
Una mirada dulse, su kayentor
Kon su propya esperanza
Su palavra ke dize “Yo so un Mediko”
Esto al lado de ti…
Su okupasyon es azer una persona de un umano
Dar a eyos la sanedad muy presyoza
Esta a la dispozisyon de la umanidad
Es el kerido, de la vida saludavle…
A la vida yena de salud buena de l’avenir…
Kon respekto i kon kerensya…
Meir GAON, 24 Şubat 2016
