Batya Natan

Djoha ke dize?

Djoha ke dize?

Devda de Ramadan (Ramazan)

  Un dia Djoha salio a vender azitunas, i sta gritando:”Gosta i toma! Gosta i toma!

Vino una mujer, gosto i le disho:”Ya stan ermozas, ma no kero merkar!”

“Toma!” le disho Djoha.” Sos vizina, no mporta! Me pagaras!”

“No, no, no” disho eya. “Es semanas de Ramadan...”

“Kualo ay?” le disho Djoha, “Te las komes dospues de Ramadan…”

“Aaa, no! le disho eya.” Antes tres anyos stuvi mala. No ize tanit”. Agora lo sto pagando!”

“Aaa!” le disho Djoha, “No tomes! Una ke paga la devda al Dio despues de tres anyos, ken save kuando me va pagar a mi l’azituna!”

 

Kontado por

RASHEL PERERA-1987

Ya meldatesh un kuento de Djoha, del muevo livro publikado por el Sentro Sefaradi. Este livro de 272 ojas es un livro de kuentos sovre Djoha ke fueron arekojidos por la Sinyora Matilda Koen-Sarano, ke paso su vida en publikando un alay de livros sovre muestra kultura i muestra lingua.

Tenemos la onor de publikar este livro ke se va vender a 35 liras en Turkiya, a 15 Euro en Evropa i a 17,5 USD en los Estados Unidos. Ya puedesh embiyar un mail a karensarhon@gmail.com o echarle un mesaje a su Whatsapp por el numero +90 5424258176.

Ya mos puedesh demandar si no temenos otro echo al lugar de publikar livros asemejantes ke no se venden muy kolay. Kreo ke no tenesh razon si pensash de esta manera. Oy en diya puedeser ke no es muy emportante de publikar este livro. Ma dospues de diez o kinze anyos esto va ser muy emportante.

Kero rengrasyar el Sinyor Yuri Sasson de Espanya (ke es orijinaryo del Mexico) ke mos ayudo materyalmente para publikar este livro. El Sinyor Sasson es el Prezidente de La Kaza Muestra i esta azyendo munchos esforsos para la konservasyon de muestra kultura.

Espero ke los enteresados van a merkar un livro para darmos koraje i la posibilidad de publikar mas ovras muy valuyozas komo este …

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın