Batya Natan

La Vida No Es Kurta, Es Mozotros Ke La Azemos Tala

En vezes no mos abastan ni las 24 oras

La Vida No Es Kurta, Es Mozotros Ke La Azemos Tala

 

La Bruyère disho: “Los ke se keshan de la kurtor del tyempo, son los ke no lo emplean komo se deve.” Ganar un poko de tyempo! Es lo ke dezeamos. Komo se puede alkansar a este buto? Naturalmente, en empleando kon ekonomiya las oras i afilu los puntos. En una manera, ser eskasos kuando se trata de muestro tyempo, syendo ke no egziste dingun remedyo de alargarlo. No puedemos tampoko, traer atras los diyas ni las oras ke pasaron…

Sintimos muy frekuentemente munchos kesharsen ke las oras no les estan abastando aunke se alevantan temprano i se echan tadre. Otros dizen: “Mis ovligasyones estan pujando i tambien, mis responsabilidades. Mi famiya se esta keshando de no verme i esta dizyendo ke eramos mas orozos antes.” Estas personas adjustan ke no tyenen tyempo afilu de repozarsen o de azer unos kuantos dias de vakansas. Puedo responder kon esta refleksyon de Ernest Hello: “Lavorar es muy simple ma, repozarse? Ayi esta la difikultad!”

Komo se puede topar tyempo para todo? Siguro, ke no es fasil. En un diya normal, topar tyempo para kada koza, en dando la prioridad a lo mas importante, es dunke una kestyon de organizasyon. La persona dezorganizada pyedre tyempo en baldes, no reushe a azer todo, i esto la rende inyervoza. A la kontra, kon un poko de organizasyon, kon kalmo, se gana tyempo, se produse mas demaziya. I esto, sin ser ovligados de alevantarsen demanyana medyo durmyendo (!) o la noche echarsen muy tadre, muertos por durmir i kansados. Es reelmente importante de tomar el esfuenyo menesterozo. Esto puede ser la garansiya de empesar el diya sigiente, kon buena umor, bien repozado.

Es provechozo de konoser las okupasyones prinsipalas, el program del diya i meterlas en un orden, si posivle. Aki, una dicha de Anatole France: “La egzistensya umana es kurta. El ombre es maestro de su tyempo, solamente kuando lo diviza en oras, en minutos i segondos. Kijo dezir, en parselas proporsyonadas kon la kurtor de la vida.”

Dunke, estamos avlando de organizasyon i en una mezura, de disiplina, ke kon tyempo, se puede transformar en uzansa. Por egzempyo, si tenesh ovligasyones a oras fiksas, es preferavle aparejar de una noche antes, lo menesterozo. Es tambyen bueno notar las ovligasyones urjentes.

No se deve pensar ke semos kapaches de realizar mas demaziya del “maksimum”. I en prinsipyo, es importante de no depasar el limito de muestras fuersas fizikas i kapachita mental. La persona ke acheto esta disiplina, kualas ke seyan sus okupasyones o su estado fiziko, ya echo un grande paso en el kamino de la reushita. Meteremos aki el punto final.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın