Kuando me bushko “Mordo Hazak” para envitarme al viaje de “Kapadokya” personalmente fue una sorpreza grande para mi porke era mi aniversaryo (bebe rizin nasido!) i aksepti esta envitasyon kon grande plazer.
Mordo kon “Cako Uyar” son dos haveres de una organizasyon de viaje, dos amigos komo ermanos ke estan realizando viajes aryento de la Turkiya i afuera, kon grande eksperyensa, kerensya i abondansya (bolluk).
Kuando arrivimos kon avion a “Nevşehir” era ocho de la demanyana, el otobus kon el giya (rehber) mos estavan asperando en el aeroporto. El grupo entero suvyo al otobus i despues ke mos asentimos i arreglimos las chantas, tomimos kamino para “Uçhisar”, ke es el lugar el mas alto de Kapadokya. La torre (kale) de Uçhisar es el lugar el mas ermozo ande se puede ver un panorama fantastiko.
Las montanyas “Hasan” kon “Erciyes” tuvyeron grande emportansa en la formasyon de las chimeneas de fadas (peri bacaları). En el mundo no egziste otra rejyon komo “Kapadokya”. Seyga kon su jeografiya, seyga kon su istorya, esta rejyon es komo un mundo de kuentos (masal alemi).
“Göreme” es el korason de Kapadokya. Göreme es entornado de munchas chimeneas de fadas de formas diferentes. Aki es un lugar ke entro al “Patrimonio Mondial del Unesco” (Unesko Dünya Mirasları)…
Las tres chimeneas ermozas (3 Güzeller) ke se formo de dos grandes i una chika chimenea es el sembol de Kapadokya.
“La Vallé de Imajinasyon” (Hayal Vadisi) un lugar ande vamos a kreer (yaratmak) muestro propyo kuento (masal) kon muestras eroines (kahraman). Otro nombre del mizmo lugar es “Develi Vadi” (la vallé de gameyo).
Despues mos fuimos a “Paşabağ” ande vimos kon grande enkantamyento (şaşkınlık) chimeneas de 14 metros de altor kon chapeyos de champinyones (mantar), chimeneas en forma de gameyo i munchas diferentes formas…
“Derinkuyu, la sivdad debasho la tyerra” (yeraltı şehri) se avyo al turizmo en el anyo 1967 . “Derinkuyu” de 36 sivdades de debasho la tyerra es la mas grande i se puede vijitar los 8 etajes. La ondura (derinlik) de aki es 40.000 metros.
En esta sivdad ay ahir (ahır), yukri (kiler), kamareta de komer, eglisya, kamareta ande se aze el vino, la eskola de los misyoneres, kamaretas de echar i kamareta de simeteryos. Veramente muy enteresante.
“La Vallé de Ihlara” es una vallé ke kon su fakto (olgu) de vejetasyon (bitki örtüsü), eglisyas, kon su istorya, natura, arte i kultura todo se topo aki i se izo el sigundo grande kanyon del mundo ke es la maraviya de la natura (doğa harikası) de Kapadokya. El rio de “Melendiz” korta (yarmak) la tyerra profondamente i traye ermozuras grandiyozas (görkemli güzellikler). En el bodre de la agua puedemos ver una tira de vedruras intensivas (yoğun bir yeşillik şeridi) ke se forman de vinyas (bağ) i de guertas.
Bolados i kansos de kaminar i suvir kolinas (yokuş) arrivimos a un restorante tipiko ande komimos por midi una karne spesyal kebap de kantaro (testi kebabı) muy savrozo.
Mordo kon Cako koryendo a todo para ke no manke nada en el grupo, para ke todos seygan kontentes. No se tyene visto este modo de amigos ke estan organizando viajes en pensando a los mas chikos detalyos.
La noche de alkavo mos fyestaron el aniversaryo de nasimyento de mi amiga i de mi. Una pasta en forma de korason kolorada kon las kandelas.
Komo de penseryo fino!
El lugar ke vijitimos el dia de alkavo fue “Güray el museo de Seramik” ande vimos komo se aze el seramik i las oyas (çömlek). Un museo muy grande ke se topa 15 metros debasho la tyerra, un lugar de 1500 metrekare ande ay 500 ovras . Este museo se konstruizo en kavakando los pinyaskos (kayaların oyulması). Aki ay ovras ke datan de 5.000 anyos. Muy muy enteresante!
Los kero remersyar de aryento del korason por este viaje muy reushido kon el grupo entero i por todos los lugares ke vijitimos kon grande plazer.
