EMEL SAYIN Un konserto inolvidavle 10 Mayo 2018 en Cemal Reşit Rey

Esti SAUL Judeo-Espanyol
16 Mayıs 2018 Çarşamba

La maraviyoza kantatris ke la Turkiya yama “kadife sesli” (boz de velur) mos endulko realmente - komo dizen “A couper le souffle”.

En el konservatuar de Estambol fue la eleva de Matmazel ALICE ROSENTHAL.

Su madre tiene raizes de Mardin. Su padre de raiz ÜSKÜP es de Salonik. Emel Sayın tomo lisiones de muzika klasika Turka kuando tenia solo 14 anyos. Sus profesores fueron ARİF SAMİ TOKER i durante dos anyos i medio MÜNİR NURETTİN SELÇUK.

En 1970 i 1980 resivio 13 vezes de “Dışişleri Bakanlığı i Kültür Bakanlığı premios i se nomino “Sanat Elçisi” (Ambasador Artistika).

Emel Sayın es la reprezentatrisa de munchas institusiones privadas. Benevolmente no manka de alegrar dando konsertos.

Sayın sinyo mas de 30 longplay diskos, i inombrables CDs i munchos diskos de 45 tornos. Emel Sayın, komo Zeki Müren, Bülent Ersoy, Muazzez Abacı, lavora kon SELÇUK TEKAY por sus albumes.

Tekay, las dos kansiones ke kompozo por la grasioza Emel Sayın, le valio el premio “Altın Kelebek Yılın Bestecisi” en los anyos 1991 i 1993.

La sala entera kantimos kon plazer i alegria, sovre la invitasion de la prima donna, las kansiones melodiozas:

“BERABER YÜRÜDÜK BİZ BU YOLLARDA” i “YORGUNUM DOSTLARIM”.

Rengrasiamos la grande, luzya i elegante “Hanımefendi” EMEL SAYIN por la performansa de tres oras agradavles ke pasimos en Estambol.