Selim Salti
La asosyasyon de los Turkanos en Israel (Itahdut Yotsei Turkia) en pasadas organizo en la sivdad de Ra’anana, lugar muy en vog de los olim de Turkiya, un konserto de kantikas en Ladino ke aze partida de las aktividades kulturales importantes de esta institusyon renomada en Israel. El konserto inkluyo diferentes djeneros de muzika djudeo-espanyola i fue una okazyon de sintir todas sus variantes en la mizma tadrada en 3 diferentes prezantasyones. El konserto duro kaji dos oras i media en la sala del Sentro de Muzika de la munisipalidad de Ra’anana, kompletamente yena. Mizmo ke topar lugar para toda la djente fue difisil; mas de trezyentas personas pasaron una tadrada maraviyoza kon la prezensya de los dirijentes de la asosiasyon i de la munisipalidad de la sivdad.
En la primera partida, Yosi Cozi Geron i Suzi Uziel kantaron en solo i endjuntos en forma de duet kantikas klasikas en muestra lingua, alegres i tristas, kon la partisipasyon de la sala, ke no manko su aplozo grande. Los mansevos prezentes de sintir sus abuelos kantar en mizmo tiempo ke los kantadores se enkantaron de ver la atmosfera.
En la sigunda partida, Sara i David Kohen Yanarocak ke forman el grupo Erensya Sefaradi, kantaron kantikas diferentes, espesialmente kantikas ke fueron eskritas por Yusuf Altıntas, amigo personal de muncho tiempo, ombre de valor, sekretaryo del Grand Rabino de Turkiya. Es ansina ke prezentaron un repertuar enteramente muevo i moderno, donde la muzika fue kompozada por David i kantada por Sara. El kuple fue akompanyado kon su violon por una ole hadasha ukranyana, la sinyora Maria en solidaridad de la apartenensya al mizmo ulpan de los Yanarocak. Miraklo de la muzika, sin konoser ebreo o una otra lingua komuna, estas personas se dieron a entender muy bueno. Verso la fin de sus program, Soni Yanarocak, el ijo grande de la famiya se adjunto a su madre i ansina kantaron madre i ijo dos kantikas ‘Kuando esto en tus brasos’ i una kantika de Çanakkale, ‘La eskala de Maydos’, aplozada kaji en pyes. Ke ermozo de ver ke un miembro de la jenerasyon mueva se enteresa a esta kultura i amostra ke eya no va despareser nunka.
En la dalkavo partida del konserto, oyimos al grupo de 12 kantadores, ombres i mujeres, onde Soni Yanarocak aze parte, el koro yamado Kolot Hamoshava. Koro amator de valor, ke fue eskojido para las festividades del 69en aniversaryo del estado de Israel. Eyos mos kantaron kantikas de ‘Kamino’ i mos enkantaron kon sus bozes i melodías. Al final los partisipantes todos endjuntos mos kantaron la kantika famosa “Adiyo”. Felisitasyones fueron dadas a los nuevos dirijentes de la Itahdut, en partikular al prezidente Ovi Gülerşen por sus kapachitades de organizar este modo de mega fiestas.
