Vıaje A Kazdağları (La Montanya İda)

Vıaje A Kazdağları (La Montanya İda)

La semana pasada, ke lunes era fyesta, me aprovechi para ir tres dias en vakansas. La persona tyene menester de repozar su puerpo i su meoyo para pueder ganar fuersas i lavorardespues kon mas muncha ardor.

Lo bushki a Mordo Hazak, ke es el organizator kon Cako Uyar del “Biz Bize Tur” (Tur Entre Mozotros) para demandar si tyene lugar por “Kazdağları” i kuando me disho ke si, kon grande plazer me eskrivi.

Vyernes demanyana, a las sesh, mos rankontrimos kon ochenta personas, dos otobuses i salimos al kamino.

Veramente estos dos amigos, dos asosyados (ortak) pensan a los mas chikos detalyos ke pueden aver en un viyaje para kontentar a los partisipantes. Komo era muy temprano i puede ser ke teniyamos ambre, mos ofresieron borekitas fina el dezayuno de demanyana.

Enfin a las mueve arrivimos a “Orhangazi” para komer i kontinuimos a “Edremit” para el komer de midi, en un lugar entornado de arvoles, el tyempo golyendo al miskle, una kaskada (şelale) koryendo, i kon la boz de la agua, me paresyo ke esto en el paradiso. Mos olvidimos de la natura (tabiat) en Estambol, de las vedruras, de las plantas (bitkiler), del aver limpyo i de munchas otras kozas….

Despues de komer ampesimos a kaminar kon un gia (rehber) los kazales de “Zeytinlik, Yeşilyurt i Adatepe” entornados de arvoles de azitunas, kon las kaskadas “Hasanboğuldu i Sütüven”.

“Kazdağları”, kon sus ermozuras fasinantes es un kanton komo paradiso de la Turkiya kon el oksijen alto ke tyene i ke se konsidera el sigundo lugar del mundo despues de las montanyas de Alp. El nombre de esta montanya era konosido komo “Ida” en la epoka antika.

Asigun la lejenda (efsane) el primer konkurso de ermozura en la istorya se realizo en Kazdağları.

En mizmo tyempo i el evenemento de dar a komer (rüşvet vermek) se realizo aki.

 Las sharas (orman) de Kazdağları empesan del bodre de la mar i suven fina 800 metros de altura. Aki es la rejyon ande se topa 800 sortes de vedruras saludozas i una multitud de plantas. Despues vijitimos el museo de Etnografya ke es un museo ke tomo un Premyo del UNESCO en el anyo 1994. La galeriya de este museo gano 36 premyos (ödül).

Lo mas enteresante es ke se topa aki la tartuga (kaplumbağa) la mas grande del mundo ke peza 360 kg i su talya es 197 cm.

El Kazal de “Yeşilyurt” es entornado de arvoles de pinos (çam) i de azitunas. Aki puedemos ver las kazas echas de pyedras ke son konformas kon la natura, los oteles chikos, las kalejas sin ruido, las kayes yenas de pas (huzur) kon las personas kon karas riyendas. Este kazal es un lugar maraviyozo para aleshar de la vida de la sivdad. El oksijen tanto alto ke kuatro sinko oras de esfuenyo esta abastando.

Lo ke es famozo aki es las azitunas, la azete de oliva, la miel i el kezo.

Los turkos i los gregos bivyeron aki komo ermanos kon una grande armonia fina el anyo 1923. Los turkos biviyan ariva de las kalejas i los gregos biviyan abasho.

Despues del interkambiyo (mübadele)los gregos desharon este kazal i se fueron a la Gresya.

Los turkos de las islas Girit i Midilli vinyeron a bivir aki.

“Adatepe” es un kazal famozo kon las kazas de pyedras istorikas ke se renovaron (yenilenmek), kon las kalejas brodadas komo dantela ke paresen a los kazales de Italya. Un lugar muy limpyo i muy byen konservado.

“El Altar de Zeus”, el lugar el mas alto de esta rejyon i el lugar ke se realizo el konkorso de ermozura entre “Hera”, “Afrodit” i “Athena”, es una kolina (tepe) ke tyene una vistaempresyonante, vyendo el golfo (körfez) de Edremit enteramente, Küçükkuyu i la isla de Midilli de muy serka.

El dia de alkavo mos fuimos a “Assos” para vijitar el kazal de “Behramkale” ke se konstruizo en el tyempo Otomano. Este kazal se topa entre las murayas (sur) antiguas i ay solamente 150 kazas. La arkitektura es famoza kon el lavoro de mano de pyedra (taş işçiliği).

Ya estavamos kansos kuando arrivimos al restorante en el bodre de la mar para komer peshkado i mezes savrozos.

Kale felisitar “Mordo” kon “Cako” ke todo el viaje estava perfekto, el otobus muy komodo, el otel de sinko estreyas, los dos koryendo a todo i todos para ke no mos mankenada.

 Fue un viaje muy fruktuozo (verimli) en el punto de vista de la natura inkreivle tanta rika de arvoles, flores i plantas, del aver limpyo i de konosimyento istoriko kon amigos keridos.

“Asta La Vista” en serka si kere el Dyo…

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın