Los 70 anyos del estado Djudio

Oy vamos a empesar a fiestar los 70 anyos del Estado Djudio. En el empesijo de los anyos ‘60 era la bar mitzva del estado. Dospues s’engrandesyo i se izo un mansevo. El Estado Israelyano agora es un pais poderozo de todas las vandas. Savemos ke de punto de vista militaria es uno de los mas poderozos paizes o armadas del mundo. Mizmo los fuzes ke se echaron dia de Shabat se esta dizyendo ke los lugares atakados eran determinados por los Israelyanos. No se si es djusto ma es lo ke se esta avlando. En turko dizimos “No ay fumo si no ay fuego” (Ateş olmayan yerden duman çıkmaz). Israel es uno de los paizes ande los mansevos dospues ke terminaron el liseo se van al askerlik. I se van no para unos kuantos mezes ma para unos kuantos anyos i esto los forma de una manera diferente. Si el estado de punto de vista sientifika si esta tanto adelantado, el askerlik es el primer factor. Ya savemos ke las kompanyias elektronikas i de kompyuteres tyenen sus departamentos en este pais i savemos ke mas de los sinkuaenta por syen de las kompanyias startup se topan ayi tambien. Los anyos dalkavo tuvyeron una grande reushidad vendyendo estas kompanyias a syenes i syenes de milyones de dolares.

Savemos ke la mas grande partida de este estado era desyertos sesenta anyos antes. Tuve la posibilidad de vijitar los echos del Keren Kayemet i vide lo ke estan azyendo dainda para tener mas i mas arvoles en el pais. Me fui kon un prezidente de una munisipalidad i reelmente kedi enkantado de ver el echo ke estavan azyendo. Ya savesh ke kreo ke es el uniko pais ke emplea las aguas suzyas. En el pais se topan dos diferentes sistemas de buris (boru düzeni) de agua; el uno es para arozar las yervas i el otro para emplear agua limpiya.

Era unos kuantos anyos antes ke siertas kompanyias turkas estavan prontos para vender las makinas de melezina i de medikeria a los estados Arabos. Se save ke mas de sinkuanta por syen de estas makinas son inventadas en este pais.

Se puede eskrivir munchas kozas sovre el desvelopamyento de este estado. Ma no es mas un pais mansevo. 70 anyos son bastante para una eksperyensya.

Munchos i buenos para el estado Djudio. Les auguro una kontinuasyon en PAS kon sus vizinos.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın