Batya Natan

PRIMAVERA En ESTAMBOL

PRIMAVERA En ESTAMBOL

Estamos bivyendo ermozos diyas de Primavera. Afuera ay un tyempo maraviyozo, el sol briyando en un sielo klaro. Tengo la impresyon ke oganyo la mueva sezon ampeso mas temprano. Fin de Marso afilu aviya arrekayentado... Para mi los sinyos konkretos de la Primavera son los arvoles delantre muestra ventana, ke ampesan a vestirsen de sus parur i de abondansa de ojas vedres komo un mirakolo...

Es ke semos konsyentes de la shans ke tenemos de bivir en una de las mas enteresantes sivdades del mundo?... D’akordo, no es mas el Estambol de muestra manseves. Ma, oy no kero tokar a este aspekto del sujeto. No tengo entisyon de entrar en kritikas i amenguar el plazer de estos diyas de Primavera, en kualos redeskuvri una chika partida de las “perlas” de la sivdad... Byen entendido, esto avlando de ermozuras naturales...

La “Arvoleriya de Emirgan” (Emirgan Korusu) es uno de los lugares ke se deve vijitar en esta sezon. Una fyesta de flores de kolores a kolores... Las palazas dando tornos en el lago miniskul o nadando… Las tulipas de diversas kolores i las manolyas ampesando a enfloreser en los arvoles... kontemplar esto todo, reelmente ke da un plazer imenso a la persona. Asigun mi, es komo kontemplar la Primavera, bivirla yena, yena antes las kalores... Aviya muncho tyempo ke no viniya a este paradizo.

No se komo va estar el tyempo kuando el lektor va meldar este teksto. Sielo eskuro? Fresko o azyendo luvya?... Ke importa!... Ansi ke ansi Mayo esta detras la puerta, kon la alegriya de Shavuot otrun poko. En mi teksto presedente eskrivi sovre los aparejos de Pesah. Oy, en eskrivyendo estas linyas ya estamos en el 8en diya de Pesah: Shemini Shel Pesah. El mez de Avril  esta kontinuando kon toda su esplendor. Ma, no vos do dinguna garansiya de tyempo klaro kuando meldarash estas linyas! En el sigundo diya de PESAH, se empeso a kontar el OMER. Sefirat Omer es un komandamiento de La TORA. Kada Djudio deve kontar El OMER i ansi dize EL Pasuk: …i todos vash a kontar los diyas (VAYIKRA 23:15).

Deke kontamos EL OMER? “Al salir de MISRAIM, los Djudios, kon despasensya ampesaron a kontar los diyas. Porke, el 49en diya ivan a resivir LA TORA en EL MONTE de SINAY. I mozotros, de mezma manera, ampesando de la sigunda noche de PESAH, DURANTE 7 SEMANAS KONTAMOS el OMER. A la fin de 49 diyas, en el 6 de SİVAN kon la FYESTA de SHAVUOT se  eskapa el kontar.

En la istoria de los djudios, la perioda de OMER fue markada kon desgrasyas i malores. Myentres la Rezistensya de SHIMON BAR KOHBA kontra la dominasyon Romana, muryeron munchos kombatantes djudios. Una Leyenda Talmudika dize ke, tambien en esta perioda, nombrozos elevos del Grande Savyo Rabi Akiva peryeron la vida en una epidemiya.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın