El rolo de la mujer

Şeli GAON Judeo-Espanyol
11 Nisan 2018 Çarşamba

La unyon de las Nasyones Unidas (Birleşmiş Milletler) aksepto ke dar los derechos iguales a las mujeres, va arezyar (güçlendirmek) la pas en el mundo.

La mujer tyene un grande rolo para la reushidad de un pais en todo modo de punta de vista.

Ay mujeres poderozas ke rezolvan todos los problemes, los echos de si para si.

La mitad de la populasyon del mundo son las mujeres. La mujer pare la kriyatura, lo engrandese, le da la formasyon menesteroza, eya es profesora en la eskola, enfirmyera en los ospitales, gizandera en su mupak, la fam de menaj en su kaza, avokata, enjenyora, arkitekta i dirija a todos.

Eya es el kapo de la famiya. Eyas lavoran para ganar paras i estar enriva de sus pyezes, para poder opozarsen a las difikultades de la vida. Eyas se entyenden de todas las reparasyones (tamirat), i de las modifikasyones (tadilat) en sus kazas i este modo pueden kontinuar sus vidas personales, sin tener menester de un ombre. Eyas pagan sus fakturas, koryen a todo modo de akontesimyento, tyenen el amor de la libertad.

Las mujeres ke tyenen una intelijensya briyante, un koraje i ke son avyertas a la varyasyon (değişim) i persigen (takip etmek) los desvelopamyentos, pueden krear tentativas reushidas (başarılı girişimler).

Eyas kon sus sintimyentos, sus lojikas (mantık), sus kulturas i la perfeksyon, la superioridad ke amostran en todo modo de espasyo, son komo las luzes ke amostran el kamino djusto en la vida.

La mujer es madre, es la kompanyera del ombre, es la kimika (kimya) de la komunidad.

Es verdad ke en la Turkiya tenemos munchas mujeres mansevas ke estan divorsadas u bivdas, biven solas i tyenen un nivel entelektual ma para poder bivir lavoran i rezisten a las difikultades.

Yo penso ke la mujer no tomo el lugar ke kere i ke en el punto de vista de la vida komersyal ni en la politika no se esta puedyendo reprezantar komo kere.

Para poder reushir en el lavoro, en la vida de la profesyon, las mujeres tyenen kalidades espesyales.

Eyas se amostran komo son, tyenen konfiensa en si mizmas, no se espantan de azer yerros, kadal dia se ambezan una koza mueva, kontrolan syempre sus konkorentes (rakipler) en el dorredor ande estan lavorando, para poder arrivar a la perfeksyon. Para pueder reushir en la vida del lavoro, eyas son korajozas, tyenen una veluntad (azim) fuerte.

En el mundo entero ay munchas mujeres, ministras emportantes, senatoras ke provaron (kanıtlamak) kon sus independensyas la reushidad en todo modo de punta de vista.

Komo por egzempyo, Golda Meir (zihrono livraha), ke fue la ministra prinsipala de Israel, i reusho en su karyera. Simone Weil ke fue la presidente de l’ONU, Hillary Clinton, senatora de New York.

Eyas son apuntadas i konosidas por todos.

No se fuyen de tomar responsabilidades.

Eyas son madres de sus ijos, mujeres de sus maridos i ijas de sus madres i padres. Tyenen una fuersa kreadora inkreivle ke da vida, lavora komo voluntarya en las organizasyones para ayudar a los ke tyenen menester.

Ande esta la mujer, ay la entuisyon (sağduyu), la fineza, la veluntad (irade), i la reushitad ke vyene kon la pasensya.  Las mujeres son muy kapaches enriva del dezeo. Eyas si se meten una koza a la kavesa, se van fin a la fin i azen lo ke dezean en arivando a sus butos.

No egziste sivilizasyon sin mujer.

La mujer es kapache, tyene kerensya, afeksyon, tolerensya, domina toda su famiya para tomarlos debasho de sus alas, para protejarlos kon sus sentimyentos de madre. Eyas son las patronas de sus kazas fina los mas chikos detalyos.

Todo se demanda de las madres. Eyas son el ekilibro entre todos.

Mujer es el monumento de la Fuersa, es una biva ke menaja a todos, es un arvole de Pasensya, lo mas emportante es la baza de la Kerensya, el Sakrifisyo, el Devuamyento i la Tolerensya.

Eyas tyenen un lugar emportante en la famiya, en la komunidad i en todos los terrenos.

Ke las Mujeres nunka ke no mos manken de muestra kavesera…