Todo kon sira ke seya

Silvyo OVADYA Köşe Yazısı
21 Mart 2018 Çarşamba

Kuando mos vamos a una seremoniya funeraria, la mas grande demanda del Dyo es ke partisipemos a estas seremonias kon muertes kon sira. Kualo kere dizir estos biervos? Si, puedemos partisipar a los funerayes ma keremos ke la sira de las famiyas no se bozdeye, keremos en primero partisipar a la seremonia del granpapa o de la gramama, dospues de sus ijas i ijos i dospues de sus inyetos. Kuando se bozdeya la sira, reelmente es una grande pena para todos.

La semana pasada eskapi mi artikolo en partajando una novedad ke dyo una dolor a los korasones de todos. Onze mansevas pyedreron sus vidas en un aksidente de un avion partikular i reelmente fue una desgrasya. Dia de jueves en dos oras vimos miles de personas ke partisiparon a las dos seremonias funerarias. Estava una dezgrasya. Muestro Gran Rabino avlo en las dos seremonias mensyonando los nombres de las onze viktimas del aksidente. Esto era lo ke bivimos en muestra propia kolektivitad. Si no fue otras desgrasyas en las meshkitas ande tuvo lugar las seremonias por las otras viktimas.

Savemos ke oy va ser “el korte”. Ma esta ferida (yara) no se va melizinarse en kurto tyempo. La ijika de kuatro mezes va yorar para alechar la teta de su madre. Los mansevos ke se estavan aparejando para kazarsen o para kontinuar sus kontaktos van a ser tristes una larga epoka. Siertos puedeser se van a olvidar ma son los paryentes - la madre i el padre – ke se van akodrar sus vida entera de estas ijas i malorozamente esta yaga no se va melizinarse vida entera …

Malorozamente estas semanas de alkavo esto partisipando kaji kada dia o kada dos dias a una seremoniya funeraria o a un limud. Ma si estas personas si son bastante aedados – depende para kada aedad lo ke es aedado - la dolor ke bivimos es manko amarga.